24 დეკემბრიდან 2 იანვრის პერიოდში შეზღუდვების დიდი ნაწილი არ მოიხსნება, მათ შორის საზოგადოებრივ ტრანსპორტთან დაკავშირებით. ამის შესახებ ინფრასტრუქტურის მინისტრობის კანდიდატმა, მაია ცქიტიშვილმა განაცხადა.

24 დეკემბრიდან ძალაში რჩება მუნიციპალური ტრანსპორტის შეზღუდვა დიდ ქალაქებში — თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში. ასევე, შეზღუდვები რჩება საქალაქთაშორისო ტრანსპორტთან დაკავშირებით. არ გაიხსნება ბაზრობები და იმუშავებენ მხოლოდ აგრარული ბაზრობები.

ზემოთ ჩამოთვლილ დიდ ქალაქებში დაშვებული იქნება სავაჭრო ობიექტების მუშაობაც, თუმცა დამატებითი რეგულაციების პირობებში. კერძოდ, სამუშაო საათები განისაზღვრება დილის 7 საათიდან საღამოს 7 საათამდე. მაღაზიის ფართის ყოველ 20 კვადრატულ მეტრზე დაშვებული იქნება ერთი მომხმარებელი. შიდა და გარე სივრცეში რიგები უნდა გაკონტროლდეს. ფასდაკლებების აქციები უნდა გამოცხადდეს ან დილის საათებში, ან ონლაინგაყიდვების დროს. ამის მიზეზი კი, როგორც ცქიტიშვილმა თქვა, ისაა, რომ მაღაზიაში ბევრი ადამიანის კონცენტრაცია არ მოხდეს.

დამატებითი შეზღუდვები შეეხება ტანსაცმლის მაღაზიებსაც, სადაც გასახდელები აღარ იმუშავებს. გარდა ამისა, ცქიტიშვილი ამბობს, რომ მაღაზიებმა პროდუქციის დაბრუნება ან გადაცვლა უნდა დაუშვან ერთი თვის ვადაში და ეს უნდა მოხდეს მხოლოდ პირველი თებერვლის შემდეგ. სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით.

"სრული პასუხისმგებლობა ეკისრება მაღაზიებისა და სავაჭრო ცენტრების ადმინისტრაციას. ნებისმიერი დარღვევის შემთხვევაში, სავაჭრო ობიექტების მიმართ განხორციელებული იქნება კანონით დადგენილი ყველა ღონისძიება. ეს გულისხმობს როგორც ჯარიმას, ისე საქმიანობის შეჩერებას", — განაცხადა ცქიტიშვილმა.

საკოორდინაციო საბჭოს გადაწყვეტილებითვე, სასტუმროების რესტორნები იმუშავებენ, მხოლოდ საღამოს 9 საათამდე. 9 საათის შემდეგ კი დაშვებული იქნება ნომერში მომსახურების სერვისი.

რესტორნები და კვების ობიექტები ქვეყნის მასშტაბით აგრძელებენ მუშაობას მხოლოდ გატანის სერვისზე. ძალაში რჩება გადაადგილების შეზღუდვა მთელი ქვეყნის მასშტაბით 21:00 საათიდან 05:00 საათამდე როგორც ქვეითად, ისე ავტომობილით. გამონაკლისი კვლავ იქნება ახალი წლის ღამე, 31 დეკემბერი და მართლმადიდებელი ეკლესიის შობის ღამე, 6 იანვარი.