საპატრიარქოს პრესსამსახურის ხელმძღვანელი, ანდრია ჯაღმაიძე აცხადებს, რომ თამრიკო ჭოხონელიძე სამებაში გამონაკლისის სახით გალობდა, ის მგალობელი არ არის და ეს იყო "შეღავათი". ასე გამოეხმაურა ის ჭოხონელიძის განცხადებას იმის შესახებ, რომ ანტიდისკრიმინაციული განცხადებების გამო შობის ღამეს სამებაში ვეღარ იგალობებს.

"თამრიკო კარგია, რომ გალობდა. ხანდახან აქ იგალობა, თუმცა თამრიკო არ არის მგალობელი. ეს იყო შეღავათი, გამონაკლისი. თამრიკოს გარდა სხვასაც უგალობია აქ, — განაცხადა მან.

ჟურნალისტის რეპლიკაზე იმის შესახებ, რომ ჭოხონელიძე 10 წლის განმავლობაში გალობდა, ჯაღმაიძე ამბობს:

"სუხიშვილების ანსამბლმა ლასკალაში ჩაატარა კონცერტი 67 წელს, თუ დღეს აღარ ატარებს, ეს იმას არ ნიშნავს, რომ ვიღაცამ, რაღაცა..."

მომღერალ თამრიკო ჭოხონელიძის განცხადებით, იგი შობის ღამეს ტაძარში აღარ იგალობებს. მისი თქმით, დისკრიმინაციის წინააღმდეგ მიმართული განცხადებების გამო "დასაჯეს" და გარკვეული "სამაგიერო გადაუხადეს".

"როდესაც, ღიად ეთერში გამოვხატე ჩემი დამოკიდებულება იმ ჩემთვის მიუღებელი საკითხისადმი, რომ არ მოგწონს ადამიანის რელიგიური მრწამსი, რასა თუ ორიენტაცია, ამიტომ უნდა ჩაიქოლოს ადამიანი, ამიტომ მისი დისკრედიტაცია ხდება, ამიტომ სამსახურებიდან ათავისუფლებენ, თუ არ მუშაობს არ იღებენ და აბულინგებენ, ამის წინააღმდეგ წავედი მე. მას შემდეგ "ტოლერანტ ადამიანთა" ჯგუფმა გადაწყვიტა, რომ შობის ღამეს, როდესაც ტაძარში ვგალობ, აღარ უნდა მემღერა", — განაცხადა მან.

2019 წლის 2 მაისს მომღერალმა თამრიკო ჭოხონელიძემ 17 მაისს, ოჯახის სიწმინდის დღის აღსანიშნავ კონცერტზე გამოსვლაზე უარი თქვა. მისი განცხადებით, ამის შემდეგ იგი თავდასხმისა და ბულინგის მსხვერპლი გახდა. გარდა ამისა, მომღერალმა თქვა, რომ სექსუალური ორიენტაციის გამო ადამიანების დისკრიმინაცია მართებული არაა.

"17 მაისი უფრო ადრე გაჟღერდა იმ ხალხის მიერ, ვინც ეს დღე ჰომოფობიასთან ბრძოლის დღედ გამოაცხადა. სექსუალური ნიშნით ადამიანის დისკრიმინაცია არ უნდა იყოს მართებული და ლამაზი. არც უფალს უთქვამს შენ ვინც არ მოგწონს, ჩაქოლეო, მან სხვადასხვანაირი ადამიანები გააჩინა დედამიწაზე", — განაცხადა ჭოხონელიძემ.