ლეიბორისტული პარტიის ლიდერის, შალვა ნათელაშვილის თქმით, ხელისუფლებასთან ყველა მოლაპარაკება უნდა შეჩერდეს და ბარიერგადალახული ოპოზიციური პარტიებისგან შეიქმნას სახალხო პარლამენტი.

"შეჩერდეს ყველა მოლაპარაკება არალეგიტიმურ ხელისუფლებასთან სანამ ევროკავშირი და ამერიკის შეერთებული შტატები არ დაგმობს პუტინისტური დიქტატურის დამყარებას ჩვენს ქვეყანაში. მეორე — სანქციებს დაექვემდებაროს არამარტო ბიძინა ივანიშვილი, რეჟიმის მეთაური, არამედ მისი ყველა ე.წ. პარლამენტის წევრი 21 მილიონერის ჩათვლით. სანქციები როგორც ფინანსური, ასევე დიპლომატიური. მესამე, უმთავრესი — პოლიტიკური პარტიებისგან, პარლამენტში არშესული ოპოზიციონერი დეპუტატებისგან შეიქმნას სახალხო პარლამენტი, როგორც საკონსულტაციო მაკოორდინირებელი პოლიტიკური ორგანო გარდამავალ პერიოდში", — განაცხადა ნათელაშვილმა.

ოპოზიციურმა პოლიტიკურმა პარტიებმა მანდატების გაუქმების თაობაზე ცენტრალურ საარჩევნო კომისიას უკვე მიმართეს. მანდატებზე ოფიცილაურად არ მიუმართავს პარტია მოქალაქეებს, პატრიოტთა ალიანსს და გირჩის სხვა ლიდერებს ზურაბ ჯაფარიძის გარდა. 31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია.