I Wanna Dance With Somebody-იმ მთავარი როლისთვის ვარსკვლავი იპოვა.

Hollywood Reporter-ის ცნობით, ბრიტანელი მსახიობი, ნაომი ეკი უიტნი ჰიუსტონის როლს შეასრულებს დაგეგმილ ბიოგრაფიულ ფილმში.

"გასული წელი მეტწილად მსახიობის ძებნაში გავატარეთ, რომელიც მომღერლის განსახიერებას შეძლებდა", — განაცხადა ფილმის რეჟისორმა, სტელა მეგიმ და დაამატა — "ნაომისთან ერთად ამ პროცესის გავლა შთამბეჭდავი იყო. მსახიობმა ბრწყინვალედ შეძლო ჰიუსტონის სასცენო ხიბლის დაჭერა და მისი პირადი ცხოვრების ადამიანური ნაწილის ჩვენება".

ყველაზე ცნობილი ფილმი, რომელშიც ეკიმ ითამაშა Star Wars: Rise of Skywalker-ია.

პროექტი 2012 წელს, 48 წლის ასაკში გარდაცვლილი მომღერლის ქონებრივი თანამონაწილეობით ხორციელდება. მუსიკალური პროდიუსერი, კლაივ დევისი ჰიუსტონის კარიერის შესახებ ინფორმაციის შეკრებაშიც მონაწილეობდა და მომღერლის ნათესავ, პეტ ჰიუსტონთან ერთად ფილმის პროდიუსერადაც მოგვევლინება.

"ნაომი ეკის საეკრანო ტესტი იმდენად ძლიერი იყო, ყურებისას უბრალოდ დამაჟრიალა. მიუხედავად იმისა, რომ ფილმში ჰიუსტონის შეუდარებელი ვოკალი იქნება გამოყენებული, ნაომის სამსახიობო შესაძლებლობებით უიტნის უნიკალური შარმი, ვარსკვლავური ძალა და ცხოვრებისეული სირთულეები არ დაიკარგება. ამ გამოწვევისთვის ნაომიზე უკეთესი მსახიობი არ მეგულება", — აღნიშნა კლაივ დევისმა.

ჰიუსტონი გრემის 54-ე დაჯილდოების წინა დღეს გარდაიცვალა. მისი სხეული ბევერლი ჰილტონში იპოვნეს, დევისის დაჯილდოების შემდგომ წვეულებამდე რამდენიმე საათით ადრე, მომღერალი აღნიშნულ ღონისძიებაზე დასწრებას გეგმავდა.

I Wanna Dance With Somebody-ის გამოსვლა 2022 წლის 24 ნოემბერს, მადლიერების დღისთვის არის დაგეგმილი.