პარლამენტის თავმჯდომარემ, არჩილ თალაკვაძემ ისევ ისაუბრა იმაზე, რომ სრულად პროპორციულ სისტემაზე გადასვლა მხოლოდ მისმა გუნდმა შეძლო და კიდევ ერთხელ შეაქო ქართული ოცნება. ამჯერად, მე-10 მოწვევის პარლამენტის ბიუროს პირველი სხდომაზე, რომელსაც, მხოლოდ ქართული ოცნების სიით გასული დეპუტატები ესწრებოდნენ.

"ჩვენს მიერ გატარებული საკონსტიტუციო რეფორმის შედეგია ისიც, რომ საქართველო მომდევნო საპარლამენტო არჩევნებზე, სრულად პროპორციულ სისტემაზე გადადის, რაც 90-იანი წლების შემდეგ, ყველა დროის ყველა პოლიტიკური თაობისთვის იყო სასურველი. თუმცა, ვერც ერთმა წინა ხელისუფლებამ ამ რეფორმის გატარება ვერ შეძლო. საზოგადოების მხარდაჭერით და ჩვენი საერთაშორისო პარტნიორების ჩართულობით, ეს გავაკეთეთ ჩვენ, ქართულმა ოცნებამ", — განაცხადა არჩილ თალაკვაძემ.

აღსანიშნავია, რომ ქართული ოცნების ლიდერები მუდმივად უსვამენ ხაზს მათ როლს პროპორციული საარჩევნო სისტემის მიღებაში და ამას პარტიის ერთ-ერთ მთავარ მიღწევად თვლიან.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

ამის შემდეგ, ქართულმა ოცნებამ მოამზადა კანონპროექტი, რომელიც 2020 წლისთვის არჩევნების ნულოვანი ბარიერით ჩატარებას გულისხმობდა. თუმცა, ქართულმა ოცნებამ თავისივე ინიცირებული კანონპროექტი ჩააგდო. პროექტის ინიციატორი 93 დეპუტატიდან, 35-მა პოზიცია შეიცვალა. საზოგადოებამ მათ "ამბოხებული დეპუტატები" შეარქვა.

კანონპროექტის ჩაგდების შემდეგ, გასული წლის ნოემბერში აქციები გაგრძელდა. რამდენიმე კვირიანი პროტესტის შემდეგ, ოპოზიციასა და მმართველ გუნდს შორის დიპლომატების მედიატორობით მოლაპარაკებები დაიწყო, რომელიც, საბოლოოდ, 2020 წლის 8 მარტის შეთანხმებით დასრულდა. შეთანხმების მიხედვით, 2020 წლის საპარლამენტო არჩევნები 120/30-ზე მანდატების თანაფარდობით ჩატარდა, ხოლო მომდევნო არჩევნები სრულად პრპორციული სისტემით უნდა ჩატარდეს.