ვიცე-პოლკოვნიკი გია ცერცვაძე კიევის სააპელაციო სასამართლომ წინასწარ პატიმრობაში დატოვა. რუსთავი 2-ის ინფორმაციით, მოსამართლემ გადაწყვეტილება იმ მოტივით ახსნა, რომ პირველი ინსტანციის სასამართლომ მათ შესაბამისი დოკუმენტაცია დაგვიანებით გადაუგზავნა. შემდეგი სასამართლო სხდომა 3 თებერვალს გაიმართება.

დღეს, საქალაქო სასამართლოს იმ გადაწყვეტილებაზე იმსჯელეს, რომლის მიხედვით გია ცერცვაძეს 40 დღიანი წინასწარი პატიმრობა შეეფარდა. იგი 2017 წლის 15 იანვარს, უკრაინის სამართალდამცავებმა დააკავეს. დაცვის მხარე აღკვეთის ღონისძიების სახის შეცვლას და მის გათავისუფლებას ითხოვდა.

ცერცვაძის განაჩენს მისი მეუღლე და თანამებრძოლები სააპელაციო სასამართლოში ელოდებოდნენ.

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში, ინტერპოლის მოთხოვნით დააპატიმრეს.

ცერცვაძის დაცვის მოთხოვნით ნაციონალურმა მოძრაობამ დღეს, 24 იანვარს საპროტესტო აქცია შინაგან საქმეთა სამინისტროსთან გამართა.