პარლამენტის დეპუტატის და ქართული ოცნების წევრის, კობა ნარჩემაშვილის თქმით, ის კონსტიტუციის პრეამბულაში საქართველოს ევროატლანტიკური მისწრაფებების შესახებ ჩანაწერის გაკეთებას მხარს არ უჭერს:

"სიტყვის თავისუფლება, გამოხატვის თავისუფლება, შრომის უფლება, ეკონომიკური თავისუფლება, საქმიანობის განხორციელების უფლება - ესენი სხვა არაფერია, თუ არა სწორედ ევროპული ღირებულებები. შესაძლებელია, რომ მოკლევადიან პერსპექტივაში ეს ამბავი დაფიქსირდეს გარდამავალ დებულებებში, ხოლო თვით შიგნით, კონსტიტუციის ძირითად კონსტრუქციაში ამ ჩანაწერის არსებობას მე პირადად მხარს არ ვუჭერ."

საქართველოს კონსტიტუციაში ევრო-ატლანტიკურ მისწრაფებებზე ჩანაწერის გაკეთება არასამთავრობო ორგანიზაციებისგან შემდგარი კოალიციის ევრო-ატლანტიკური საქართველოსთვის ინიციატივაა.

კოალიცია საქართველოს საკონსტიტუციო კომისიას შემდეგ ფორმულირებას სთავაზობს:

"ჩვენ, საქართველოს მოქალაქენი, რომელთა ურყევი ნებაა, დავამკვიდროთ დემოკრატიული საზოგადოებრივი წესწყობილება, ეკონომიკური თავისუფლება, სოციალური და სამართლებრივი სახელმწიფო, უზრუნველვყოთ ადამიანის საყოველთაოდ აღიარებული უფლებანი და თავისუფლებანი, განვამტკიცოთ სახელმწიფოებრივი დამოუკიდებლობა და სხვა ხალხებთან მშვიდობიანი ურთიერთობა, ჩვენი ქვეყნის ევროპული და ევროატლანტიკური კურსის, ქართველი ერის მრავალსაუკუნოვანი სახელმწიფოებრიობის ტრადიციებსა და საქართველოს 1921 წლის კონსტიტუციის ისტორიულ-სამართლებრივ მემკვიდრეობაზე დაყრდნობით ღვთისა და ქვეყნის წინაშე ვაცხადებთ ამ კონსტიტუციას."