ქართული ოცნების ერთ-ერთმა ლიდერმა ზაქარია ქუცნაშვილმა გია ცერცვაძის საქმეზე პალიტრანიუსის გადაცემაში 360 გრადუსი ისაუბრა. მისი თქმით, საქართველო არ იყო ვალდებული ცერცვაძე დაეკავებინა საზღვარზე და არც სხვა რომელიმე ქვეყნის ვალი იყო დაპატიმრების შესახებ ეცნობებინა საქართველოს ხელისუფლებისთვის:

"რატომ გაატარეს საქართველოს საზღვარზე? - ეს ძალიან აბსურდული შეკითხვაა, აბა უნდა დაეპატიმრებინათ? საქართველო მასზე დევნას არ აწარმოებდა, ბრალი არ ჰქონდა წაყენებული, აბა რა უნდა ექნა? სხვა ქვეყანამ დაიჭირა, სხვა ქვეყანა ასამართლებს და პასუხს საქართველოს სთხოვთ? საქართველოს იმაზე უნდა მოვთხოვოთ პასუხი, რომ როცა გაიგო დაპატიმრებაზე, შემდეგ უნდა მოიკითხოს, ჩაერიოს ამ საქმეში და სთხოვოს ექსტრადირების უფლება არ გამოიყენოს რუსეთის სასარგებლოდ".

ქუცნაშვილი აცხადებს იმასაც, რომ მთავრობამ ცერცვაძის უკრაინაში დაკავების შესახებ მედიის საშუალებით შეიტყო:

"ცდებით, თუ გგონიათ ის, რომ ეს ამბავი გვიან გავიგეთ, იუსტიციის სამინისტროს ბრალია. დაპატიმრებებს ქვეყნები ერთმანეთს არ უთნხმებენ. როდესაც უცხოეთში აპატიმრებენ საქართველოს მოქალაქეებს, თქვენ გჯერათ რომ ეს წინასწარ შეთანხმებულია საქართველოს მთავრობასთან? საქართველოს მთავრობამ მედიის საშუალებით გაიგო ინფორმაცია, რომ იგი უკრაინაში იყო დაპატიმრებული".

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში დააპატიმრეს.

ცერცვაძის დაცვის მოთხოვნით ნაციონალურმა მოძრაობამ დღეს, 24 იანვარს საპროტესტო აქცია შინაგან საქმეთა სამინისტროსთან გამართა.