თბილისის მერის, კახა კალაძის თქმით, კონკრეტული ოპოზიციური პარტიები საერთაშორისო და სტრატეგიულ პარტნიორებს აბულინგებენ. მისივე თქმით, ამ პარტიებს არ სურთ ქვეყანაში სიმშვიდის შემოტანა.

"თქვენ ხედავთ ბოლოდროინდელ გაკეთებულ განცხადებებს, რომლებიც ძალიან დამაზიანებელია ზოგადად ჩვენი ქვეყნისთვის, ქვეყნის განვითარებისთვის. ნათელი არის ერთი რამ, რომ ერთ მხარეს რჩება ნათელი ძალა, რომელიც ზრუნავს ქვეყნის მომავალზე, ქვეყნის ეკონომიკურ განვითარებაზე და წინსვლაზე და მეორე მხარეს რჩება კონკრეტული ოპოზიციის წარმომადგენლები, ბნელი ძალა, პირდაპირ ვიტყოდი, ბოროტება, რომლებსაც არანაირი სურვილი არა აქვთ, რომ ქვეყანაში შემოიტანონ სიმშვიდე და მოხდეს ქვეყნის განვითარება. ეს ყველაფერი გადაიზარდა ჩვენი საერთაშორისო პარტნიორების ბულინგში, ჩვენი სტრატეგიული პარტნიორების ბულინგში, რაც, რა თქმა უნდა, ძალიან ცუდი და დამაზიანებელია", — ამბობს კალაძე.

ნაციონალური მოძრაობის ერთ-ერთმა ლიდერმა, ნიკა მელიამ 2 დეკემბერს, მთავარი არხის ეთერში განაცხადა, რომ არ გაიზიარებს იმ ელჩების "გულწრფელ ქომაგობას", თუ რომელიმე არსებულ სიტუაციას, ერთპიროვნულ მმართველობას, პოლიტიკურ დევნასა და არჩევნების გაყალბებას ვერ დაინახავს. მისივე თქმით, ამ პროცესებში არასწორი პოზიციების დაფიქსირება სტრატეგიული პარტნიორობის ღალატია.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მეოთხე რაუნდი 8 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ განაცხადეს, იყო პუნქტები, რომლებზეც თანხვედრა მოხდა, თუმცა, დარჩა რამდენიმე პრინციპული პუნქტი, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება. ამ ეტაპზე მოლაპარაკებების მეხუთე რაუნდის მოლოდინია.