Wizz Air-ის კორპორაციული კომუნიკაციების ხელმძღვანელის, ანდრაშ რადოს თქმით, სავარაუდოდ Wizz Air საქართველოში, მარტში დაბრუნებასა და ახალი მიმართულებების დამატებას გეგმავს.

გადაცემა ბიზნესპარტნიორთან ანდრაშ რადოსმა განმარტა, რომ გეგმაში იმ 40-მდე მიმართულების ფრენების აღდგენაა, რომელზეც Wizz Air-ი პანდემიამდე დაფრინავდა. თუმცა, აღნიშნავს იმასაც, რომ საბოლოო გადაწყვეტილების მიღება COVID-19-ის განვითარებასა და იმ დროისთვის არსებულ შეზღუდვებზეა დამოკიდებული.

"ჩვენ მთავრობასთან დიალოგის მუდმივ რეჟიმში ვართ. ყოველთვის გვაქვს მათთან მოლაპარაკებები. ამ მხრივ არაფერი შეცვლილა. ძალიან მოხარულები ვართ იმით, რომ შეგვიძლია დაბრუნება და ოპერირების განახლება. ოპერირების განახლებას ჩვენ მარტში ვგეგმავთ. მაგრამ, რა თქმა უნდა, ყველაფერი მაინც იმ შეზღუდვებზე იქნება დამოკიდებული", — ანდრაშ რადო. (საზოგადოებრივი მაუწყებლის თარგმანი)

Wizz Air-ის კორპორაციული კომუნიკაციების ხელმძღვანელი, არ გამორიცხავს, რომ რამდენიმე, მიმართულების დამატება მოხდეს, მაგრამ, ამაზე საუბარი მარტში უკეთ შეეძლება.

"ჩვენ ქუთაისიდან ჩვეულებრივი პირობების დროს დაახლოებით 30-40 მიმართულებით დავფრინავდით. გვსურს, რომ ყველა მიმართულება აღვადგინოთ, ასევე, რამდენიმე ახალიც დავამატოთ. მაგრამ ამაზე საუბარი რელევანტური მარტში იქნება. როდესაც დავინახავთ, რომ ფრენების აღდგენის შესაძლებლობა გვექნება. ყველა მიმართულებით დავიწყებთ ფრენას, თუ თავდაპირველად მხოლოდ რამდენიმე მიმართულებით, ამ დეტალებზე საუბარი მოგვიანებით შემეძლება. ჩემთვის მარტივი წარმოსადგენია ახალი მიმართულებების დამატებაც. ამ ეტაპზე სხვას ვერაფერს დაგიკონკრეტებთ", — განაცხადა რადომ. (საზოგადოებრივი მაუწყებლის თარგმანი)

კორონავირუსთან დაკავშირებული უწყებათაშორისი საკოორდინაციო საბჭოს გადაწყვეტილებით, 21 მარტიდან საჰაერო მიმოსვლა სრულად შეწყდა. რამდენიმე თვის განმავლობაში ფრენის უფლება მხოლოდ საქართველოს ავიახაზებს ჰქონდა, რომელიც სპეცრეისებს ასრულებდა.