ლეიბორისტული პარტიის ლიდერმა, შალვა ნათელაშვილმა განაცხადა, რომ აშშ-ს ელჩის რეზიდენციაში გამართულ მოლაპარაკებათა ფორმატში საიდუმლო არაფერია და იმედოვნებს, რომ მოლაპარაკებების მაგიდასთან ივანიშვილი დახვდება.

"ძალიან დიდი იმედი მაქვს, როცა მოლაპარაკებაზე შევალ, დამხვდება საკუთარი ბუნაგიდან გამომძვრალი ივანიშვილი, რომელიც გუშინ მოვიწვიეთ მოლაპარაკებაზე. ის ხომ პარტიის ლიდერია, მოვიდეს, როგორც ჩვენ. არაფერი საიდუმლო ამ მოლაპარაკებათა ფორმატში არ არის, რაც შესაძლოა, ჩვენ არ ვიცოდეთ. ივანიშვილი გვთავაზობს, დავთანხმდეთ, საარჩევნო რეფორმასა და კოსმეტიკურ ცვლილებებს პარლამენტში შესვლის სანაცვლოდ. სამაგიეროდ, მოითხოვს, მისი კრიმინალური ბანდა, პარლამენტად წოდებული 2024 წლამდე დარჩეს ხელისუფლების უმაღლეს მმართველად. მოლაპარაკებები, შესაძლოა, იყოს გახანგრძლივებულიც, მაგრამ არ დამთავრდება, სანამ არ დაინიშნება ახალი საპარლამენტო არჩევნები. 11-ში მთელი მსოფლიო იხილავს თვითწოდებული პარლამენტის შეკრებას და მის იმავე დღეს გარდაცვალებას", — განაცხადა შალვა ნათელაშვილმა.

გუშინ შალვა ნათელაშვილმა განაცხადა, ელჩებს შუამდგომლობა მოსთხოვა, რომ ქართული ოცნების თავმჯდომარე, ბიძინა ივანიშვილი მეოთხე რაუნდზე პირადად გამოცხადდეს.

"ვინაიდან ამ ქვეყანაში, საუბედუროდ, ყველაფერს წყვეტს ერთი კაცი — ოლიგარქი ივანიშვილი და არა მისი პარტია ან პარტიის ლიდერები, ოპოზიცია ან ელჩები, ამიტომ მოვითხოვე, მეოთხე რაუნდზე ბიძინა ივანიშვილი პირადად გამოცხადდეს და პირადად გაგვცეს პასუხი იმ პრობლემებზე, რომელიც აქ წყდება", — განაცხადა მან.

აშშ-ს ელჩი, კელი დეგნანი, ოპოზიციისა და სახელისუფლებო გუნდის წარმომადგენლებთან ერთად შეხვედრებს მართავენ, რათა პოლიტიკური კონსენსუსი შედგეს და კრიზისი, რომელიც 31 ოქტომბრის არჩევნებს მოჰყვა, განიმუხტოს.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

დღეს კი გავრცელდა ინფორმაცია, რომ ზოგიერთი ოპოზიციონერი პარლამენტში შესვლას აპირებს. ამ დროისთვის, ოპოზიციაში აცხადებენ, რომ შესვლას არ აპირებენ და თუ ვინმე აპირებს, ეს მისი პირადი პასუხისმგებლობაა.