ევროპული საქართველოს ერთ-ერთმა ლიდერმა, სეგი კაპანაძემ ოპოზიციური პარტიების მოლაპარაკების დასრულების შემდეგ განაცხადა, რომ საერთო პოზიციაა პარლამენტში არ შესვლა.

საერთო პოზიციაა, რომ არ შევდივართ და მოლაპარაკებების რაუნდი აწი იქნება, ეს კონსულტაციების რაუნდი იყო. ევროპული საქართველო არ შედის. ოპოზიციური ლიდერები საერთო პოზიციაზე ვართ, ვინმე რამეს თუ შეცვლის, ამას იტყვის თვითონ საჯაროდ. მე მაქვს ძალიან დიდი იმედი, რომ არავინ არ შევა ოპოზიციის მხრიდან და ვინც შევა ეს იქნება ღალატი იმ ამომრჩევლის, რომელიც დღეს ამბობს, რომ არჩევნები გაყალბდა და რომელიც ამბობს, რომ არ უნდა მიმვცეთ ლეგიტიმაცია ამ პარლამენტს", — განაცხადა კაპანაძემ.

გამარჯვებული საქართველოს ლიდერმა, ირაკლი ოქრუაშვილმა დღეს საკუთარ ფეისბუქ გვერდზე დაწერა, რომ ოპოზიციონერი დეპუტატების ნაწილი, ბოიკოტის მიუხედავად, მაინც შევა პარლამენტში.

მეათე მოწვევის პარლამენტის პირველი სხდომა 11 დეკემბერს გაიმართება.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

გაიგეთ მეტი: