ნაციონალური მოძრაობის ლიდერის, ნიკა მელიას თქმით, შესაძლოა ოპოზიციონერი დეპუტატების ნაწილს ჰქონდეს სურვილი შევიდეს პარლამენტში, მაგრამ, მათ, მელიას ვარაუდით, შესაძლოა ეშინოდეთ მორალური პოლიციის.

"... ვერანაირად ვერ დავდებ თავს, მაგრამ, შესვლის სურვილი შეიძლება ვიღაცებს ჰქონდეთ, მაგრამ, იცით რა პარალელს გავავლებდი, მაგალითად, ბევრ საჯარო მოხელეს აქვს ქრთამის აღების ცდუნება, მაგრამ, ეშინია პროკურორის, ეშინია პოლიციის უფროსის, პოლიციის, კანონის, რომ არ დაისაჯოს. აქაც, ალბათ ვიღაცებს აქვთ ცდუნება, სურვილი რომ შევიდნენ, მაგრამ, ეშინია, ამ შემთხვევაში, მორალაური პოზიციის", — განაცხადა ნიკა მელიამ.

ვრცელდება ინფორმაცია, რომ ბოიკოტის მიუხედავად, ოპოზიციონერი ლიდერების ნაწილი შესაძლოა მაინც ვიხილოთ პარლამენტში. ამ ვარაუდს საჯაროდ აჟღერებს გამარჯვებული საქართველოს ლიდერი, ირაკლი ოქრუაშვილი.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.