თბილისის ინფექციური პათოლოგიებისა და შიდსის ცენტრის დირექტორის, თენგიზ ცერცვაძის განცხადებით, ექიმები, რომლებიც საქართველოდან სამუშაოდ საზღვარგარეთ მიდიან, წარმოიდგენენ, რომ აქ დარჩენილ კოლეგებზე მაღლა დგანან. ამის შესახებ ცერცვაძემ ფორმულას ეთერში ისაუბრა.

"შთაბეჭდილება მრჩება, რომ ეს სიმპტომი მოქმედებს — როდესაც მიდიხარ ქვეყანაში, რომელიც განვითარების დონით უფრო მაღლა დგას ვიდრე ის ქვეყანა, საიდანაც შენ წახვედი, არის ეს, დამიჯერეთ, ეს ყველაფერშია, ის პიროვნება, ვინც წავიდა, იმ ფაქტით, რომ მათ მიეცათ საშუალება, იმუშაონ უფრო მაღალგანვითარებულ ქვეყანაში, თავს წარმოიდგენენ, რომ უფრო მაღლა დადგნენ, ვიდრე კოლეგები, ვინც საქართველოში დარჩნენ. ზოგი კადრულობს, რომ ზევიდან იყუროს, ზოგი არ კადრულობს, მათი კულტურის საქმეა. ვიღაცას საფუძველი აქვს და ვიღაცას არ აქვს. მარტო ის, რომ იქ მუშაობს, არანაირი საფუძველი არაა", — განაცხადა თენგიზ ცერცვაძემ.

ცერცვაძის ეს გამოხმაურება ეხებოდა იმ ექიმების ფეისბუქპოსტებს, რომლებმაც ის და მისი მკურნალობის მეთოდი გააკრიტიკეს და მოძველებული უწოდეს. ცერცვაძემ, ასევე, აღნიშნა, რომ უცხოეთში მცხოვრები ქართველი ექიმებიდან ზოგი დადებითად აფასებს მათ საქმიანობას, ზოგიც უარყოფითად, თუმცა, მათგან რაიმე საქმიანი შენიშვნა ჯერ არ მოუსმენიათ.