ეკონომიკის მინისტრის, ნათია თურნავას, თქმით, მას შემდეგ, რაც საგადასახადო კანონმდებლობაში ცვლილება შევიდა და საერთაშორისო სტატუსის მქონე კომპანიებს საშემოსავლო და მოგების გადასახადი 5 პროცენტამდე შეუმცირდათ, ერთი ამერიკული კომპანია ეპამი უკვე შემოვიდა და მეორეს შემოსვლაც დააანონსა.

"მნიშვნელოვანი ცვლილება, რაც შევიდა საგადასახადო კანონმდებლობაში, საერთაშორისო კომპანიების სტატუსთან დაკავშირებით, რომლის მიხედვითაც IT და ზოგიერთ კომპანიებს შეუმცირდათ მოგებისა და საშემოსავლო გადასახადი 5 პროცენტამდე, ამის შემდეგ შემოვიდა ძალიან მსხვილი ამერიკული კომპანია ეპამი, რომელიც 1000-მდე ადამიანს ასაქმებს. ახლა უკვე შემოდის კიდევ ერთი ამერიკული კომპანია, რომლის სახელსაც მალე გავაჟღერებთ და რომელიც დაასაქმებს ძალიან ბევრ სპეციალისტს. სულ ერთი თვე გავიდა, რაც ეს ცვლილება შემოვიღეთ და უკევ ასეთი შედეგი გვაქვს", — განაცხადა ნათია თურნავამ.

ეკონომიკის მინისტრმა აღნიშნა ისიც, რომ გარდა ამ ცვლილებისა, უცხოური ინვესტიციების მოზიდვის მიზნით ცვლილება შეიტანეს პროგრამა აწარმოე საქართველოს კომპონენტებშიც, რაც გულისხმობს კომპანიებისთის მთავრობისგან 1 მილიონამდე ოდენობის ლარის დახმარების გაწევას. თურნავას თქმით, ეს თანხა ისევ ადგილობრივი კადრების მომზადება-გადამზადებასა და გარკვეულ ინფრასქტრუტურულ საქმიანობას მოხმარდება.