2017 წლის ადგილობრივი თვითმმართველობის არჩევნებისთვის 39 011 899 ლარი დაიხარჯება. დადგენილება ცესკოს თავმჯდომარემ 20 იანვარს მიიღო.

დადგენილების მიხედვით, ყველაზე მეტი თანხა - 28 120 049 ლარი არჩევნების ჩატარების ღონისძიებებისთვის არის გათვალისწინებული, თითქმის მეოთხედი - 7 619 000 ლარი - საარჩევნო სუბიექტის წარმომადგენელთა დაფინანსებისთვის. ამავე პერიოდში საარჩევნო სუბიექტების სატელევიზიო რეკლამის განთავსების ხარჯი 2 242 850 ლარი იქნება. 2017 წლის თვითმმართველობის არჩევნებისთვის ყველაზე ცოტა თანხა - 1 030 000 ლარი არჩევნებისათვის მოხელეთა მომზადება - გადამზადებას მოხმარდება.

2016 წლის საპარლამენტო არჩევნებისთვის გამოყოფილი თანხა დაახლოებით 5 მილიონით ნაკლები იყო. 34 371 400 ლარიდან ყველაზე დიდი წილი - 27 220 700 ლარი - წლევანდელის მსგავსად, არჩევნების ჩასატარებელი ღონისძიებებისთვის იყო განკუთვნილი. წლევანდელთან შედარებით დაახლოებით 3,5 მილიონით ნაკლები - 4 190 500 ლარი გაითვალისწინეს საარჩევნო სუბიექტის წარმომადგენელთა დაფინანსებისთვის. ამავე პერიოდში საარჩევნო სუბიექტების სატელევიზიო რეკლამის განთავსების ხარჯები 1 981 100 ლარი იყო, რაც თითქმის 300 ათასით ნაკლებია წელს ანალოგიური მომსახურებისთვის გათვალისწინებულ ფასზე. ყველაზე ცოტა თანხა - 979 100 ლარი შარშანაც არჩევნებისთვის მოხელეთა მომზადება-გადამზადებაზე მოდიოდა.

როდის გაიმართება თვითმმართველობის არჩევნები ზუსტი თარიღი უცნობია.