ახალქალაქის, კუმურდოს და კარის მიტროპოლიტი ნიკოლოზის თქმით, მას ტექნიკის ერთ-ერთი მაღაზია ხვალ, 2 დეკემბერს iPhone 12-ს აჩუქებს. გარდა ამისა, მან განმარტა, რაში სჭირდება ეს ტელეფონი და დღის კურიერის სტუდიაში iPhone-ის აქსესუარები მიიტანა.

როგორც მან რუსთავი 2-ის ეთერში ისაუბრა, თავდაპირველად არ იცოდა, რომ iPhone 11 ბოლო მოდელი იყო და შემდგომი მოდელი გაყიდვაში არ გამოსულა.

"ორ კვირაში მოხდა iPhone 12-ის პრეზენტაცია. მაღაზიებში დაიწყეს რეკვა, მეუფე ნიკოლოზმა თქვა, iPhone 12 ყოფილა გამოსულიო და თუ შეიძლება მოგვეცითო. ისეთი რიგები დადგა, რომ მოუწიათ ახალ პარტიების გამოწერა... ერთ-ერთი მაღაზიიდან დამირეკეს და მითხრეს, ისეთი კარგი საქმე გაგვიკეთეთ, გვინდა, რომ iPhone 12-ის პირველი მფლობელი თქვენ იყოთო. ახლა რაშია საქმე. არ ჰქონდათ მიღებული. მერე დამირეკეს და მითხრეს, კი არ დაგვიწყებიაო, გვინდა, ყველაზე კარგი iPhone გქონდეთო, 512 გეგაბაიტი მეხსიერებით. ხვალ, პირველ საათზე უნდა მოხდეს გადმოცემა", — განაცხადა მიტროპოლიტმა.

ტელეფონის სარგებლიანობაზე საუბრისას მეუფე ნიკოლოზმა ახსენა, რომ iPhone-ს აქვს სამი კამერა, გარდა ამისა, მან სტუდიაში მიიტანა რამდენიმე აქსესუარი: ტელეფონის ჩასართავი პულტი, მეხსიერების ბარათი და მიკროფონი, იგივე "პეტლიჩკა". როგორც მიტროპოლიტმა განმარტა, მას ტელეფონი ვიდეოების გადასაღებად სჭირდება.

"ძალიან ახლოს შემიძლია დაგიჭიროთ ტელეფონი, გამოჩნდებით მთლიანად, რადგან სამი კამერა აქვს და თქვენი ხმა კარგად ჩაიწერება. ანუ პროფესიონალური კამერაა. ჩემთვის ეს ტელეფონი არაა, ჩემთვის ეს პროფესიონალური კამერაა. ჩემი პროფესიით კინემატოგრაფიასთან მაქვს შეხება. ამიტომ ვიღებ ვიდეოებს, ფილმებს და ვდებ იუთუბარხზე", — აღნიშნა მიტროპოლიტმა.

ამასთან, მეუფემ დააზუსტა, რომ ამჟამად მას iPhone 11 Pro აქვს.