პარლამენტის ყოფილი თავმჯდომარე, დავით უსუფაშვილი აცხადებს, რომ თანდათანობით უფრო აქტიურად ჩაერთვება საქართველოს პოლიტიკურ პროცესებში. ამის შესახებ უსუფაშვილმა ტელეკომპანია იმედის ეთერში ისაუბრა:

"მე არ ვჩქარობ, ვიქნები ნელ-ნელა უფრო აქტიური პერსონალურად იმიტომ, რომ გავიდა ის დრო, როცა ჩავთვალე, რომ პერსონალურად მე უნდა ვყოფილიყავი ჩუმად. აღარ ვიქნები ჩუმად, ვიქნები აქტიური - მედიაშიც, შეხვედრებზეც, საკონსტიტუციო კომისიასთან ურთიერთობაშიც, უცხოეთშიც, ბევრი საინტერესო ვიზიტიც მაქვს დაგეგმილი და ა.შ. მაქვს ინტენსიური ქონტაქტი იმ ადამიანებთან, რომლებთანაც ორი ათეული წელია ვარ პოლიტიკაში, რესპუბლიკური პარტიის წევრები, რომლებმაც ასევე გადაწყვიტეს სხვა ცხოვრების გაგრძელება. მაქვს ურთიერთობა პოლიტიკური გამოცდილების მქონე ადამიანებთან, ექსპერტებთან, ბიზნესის წარმომადგენლებთან, უცხოეთში მყოფ ადამიანებთან."

უსუფაშვილის თქმით, ის პოლიტიკიდან არასდროს წასულა და უბრალოდ "პაუზა" ჰქონდა აღებული. მისივე თქმით, მისი ძირითადი ამოცანაა ისეთი პოლიტიკური ორგანიზაციის შექმნა, რომელიც არ იფიქრებს, რომ ერთადერთი და განუმეორებელია:

"ჩვენ ვამოძრავებთ ეტაპობრივად. ადგილობრივი არჩევნები არის ძალიან მნიშვნელოვანი მოვლენა და ჩვენ გვექნება პასუხი ამის თაობაზე, მაგრამ ძირითადი ამოცანა იქნება რამდენიმე წელიწადში, დაუღალავი შრომით, ნელ-ნელა, მაგრამ ისეთი პოლიტიკური ორგანიზაციის შექმნა, რომელსაც გენეტიკურ კოდში ექნება, რომ ის არ იქნება ერთადერთი, რომ არ იქნება განუმეორებელი, რომ მას სჭირდება პარტნიორები. ამიტომ, ჩვენ გვექნება მუდმივი პარტნიორობა ყველასთან, ვისთანაც ამის საშუალება გვექნება."

დავით უსუფაშვილმა რესპუბლიკური პარტია 29 ოქტომბერს დატოვა. მისი თქმით, მისი გადაწყვეტილების მიზეზი, პარტიის მომავალთან დაკავშირებით მის ლიდერებს შორის არსებული განსხვავებული პოლიტიკური ღირებულებები იყო.