საქართველოს ტურისტული პოტენციალის პოპულარიზაციისთვის 2017 წელს სარეკლამო კამპანიებში 2 530 376 ლარის დახარჯვა იგეგმება. საქართველოს ტურიზმის ეროვნულ ადმინისტრაცია გეგმავს სარეკლამო აქტივობებს, რომელშიც გათვალისწინებულია ტელე, ინტერნეტ, ბეჭვდითი რეკლამა და სარეკლამო/მარკეტინგული კამპანიების ორგანიზება.

ტურიზმის ეროვნული ადმინისტრაცია მიიჩნევს, რომ დაგეგმილი აქტივობებით საქართველოს, როგორც ტურისტული ქვეყნის პოპულარიზაცია მოხდება და მეტი ვიზიტორი ეწვევა ქვეყანას.

სარეკლამო მომსახურებისთვის - სოციალური ქსელებში, ბეჭვდურ მედიაში, ტელევიზიებში ჯამში - 1 805 746 ლარის დახარჯვა იგეგმება, დანარჩენი თანხა კი მარკეტინგულ აქტივობებში.

2 530 376 ლარად დაგეგმილია საგამოფენო სტენდების 10 ქვეყნის გამოფენებზე განთავსება. 10 ქვეყნიდან საქართველოში, თბილისში სტენდის განთავსება, 8 ქვეყანაში იგივე მომსახურებაზე ძვირი ღირს.

1. ბერლინი, გერმანია - 130 ათასი ლარი;
2. თბილისი, საქართველო - 90 ათასი ლარი;
3. ბრიუსელი, ბელგია - 60 ათასი ლარი;
4. დუბაი, არაბთა გაერთიანებული საემირო - 60 ათასი ლარი;
5. ბაქო, აზერბაიჯანი - 40 ათასი ლარი;
6. ალმაატა, ყაზახეთი - 40 ათასი ლარი;
7. თელავივი, ისრაელი - 30 ათასი ლარი;
8. პეკინი, ჩინეთი - 30 ათასი ლარი;
9. კიევი, უკრაინა - 30 ათასი ლარი;
10. რიგა, ლატვია - 25 ათასი ლარი

გერმანიაში, დამატებით, პრეზენტაციის ორგანიზებისთვის - 2 360 ლარი, ღვინის დეგუსტაციისთვის - 1 180 ლარი და კვებისთვის - 590 ლარი დაიხარჯება.

პირდაპირი შესყიდვითვე შეიძენს ტურიზმის ადმინისტრაცია გამოფენებზე გასავრცელებელი საპრომოციო მასალის ბეჭვდის (170 ათასი ლარი), ღონისძიების ორგანიზებისა (15 ათასი ლარი) და ჩინეთის გამოფენაზე გასავრცელებელი ბროშურის ტექსტის რედაქტირების (500 ლარი) მომსახურებას.

ამ მომსახურების გამარტივებული წესით შესაძენად ტურიზმის ადმინისტრაციას შესყიდვების სააგენტოს თანხმობა უკვე აქვს.

"ზემოაღნიშნული საქონლისა და მომსახურებების შესყიდვასთან დაკავშირებული პროცედურების შეფერხების თავიდან აცილების მიზნით, მიზანშეწონილია, აღნიშნული შესყიდვები განხორციელდეს მაქსიმალურად შეზღუდულ ვადებში. შესაბამისად, სააგენტო მიიჩნევს, რომ სახეზეა სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარებით შესყიდვის განხორციელების საჭიროება," - წერს შესყიდვების სააგენტოს თავმჯდომარე, ლევან რაზმაძე თანხმობის შესახებ გამოცემულ 20 იანვრის განკარგულებაში.