A Dog's Purpose Universal Pictures-ისა და Amblin Entertainment-ის ერთობლივი კომედიური ჟანრსი ფილმია, რომლის პრემიერაც 2017 წლის 27 იანვარს უნდა გამრთულიყო.

ერთი შეხედვით, ფილმი ნამდვილად კომედიურია, თუმცა ის, რაც მისი გადაღებების დროს ხდებოდა, ცხოველთა უფლებების დამცველი ორგანიზაციების აქტიური პროტესტის მიზეზი გახდა. ამის გამო კინოკომპანიებმა ფილმის პრემიერა გააუქმეს, მაყურებელმა კი ჯერ არგამოსულ ფილმს კინოსაიტ Imdb-ზე დაბალი ქულები დაუწერეს.

ფოტო: IMDB

პროტესტის მიზეზი გადასაღები მოედნიდან გავცელებული კადრები გახდა, რომლებშიც ჩანს, თუ როგორ აიძულებენ გერმანულ ნაგაზს ხელოვნურად მოწყობილ აუზში ჩასვლას, სადაც წყალი ძლიერი ნაკადით მიედინება. ძაღლს კი ნამდვილად არ ეხალისება რამდენიმე კადრის გადასაღებად იქ ყოფნა.

ცხოველთა დამცველი ორგანიზაციები, მათ შორის PETA ბოიკოტს უცხადებენ ფილმს და მოუწოდებენ კინოკომპანიებს, რომ არასდროს გამოიყენონ ცხოველები მსგავსი ფილმების გადაღებების დროს.

ფილმის პროდიუსერი ჯავინ პალონე კი ამბობს, რომ ეს თითიდან გამოწოვილი ამბავია.

"არცერთი ცხოველი არ დაშავებულა, შესაბამისად ვერავინ მოგვთხოვს, რომ კინოწარმოებაში ცხოველები აღარ გადავიღოთ, თავადაც ხვდებიან, რომ ეს თითიდან გამოწოვილი და გულუბრყვილო ამბავია", - ამბობს პალონე.

თუმცა, როგორც ცნობილია, PETA კერძო მონიტორინგის ჩატარებას ითხოვს, რათა გამოვლინდეს, ირღვეოდა თუ არა გადაღებების დროს სხვა ცხოველების უფლებებიც.

"ჩვენამდე მოვიდა ხმა, რომ გადაღებების დროს ყველა ცხოველი საფრთხის ქვეშ იმყოფებოდა, არ ვიცით, ეს რამდენად შეესაბამება სიმართლეს, თუმცა უნდა ვიკითხოთ და გამოვიძიოთ", - ამბობენ ცხოველთადამცველები.

შეგახსენებთ, რომ სულ ცოტა ხნის წინ ამერიკაში 146 წლის ცირკი ჰოლივუდის ვარსკვლავების აქტიური პროტესტის შედეგად დაიხურა. აქტივისტები, რომლებიც ეწინააღმდეგებოდნენ ცირკის ცხოველებისადმი სასტიკ მოპყრობას, ამ გადაწყვეტილებას სიხარულით შეხვდნენ და იმედი გამოთქვეს, რომ სხვა ცირკებიც ამ ბედს გაიზიარებენ.

საბოლოოდ კი ხანგრძლივი სასამართლო პროცესის დასრულების შემდეგ, რომელიც ცხოველთა უფლებადამცველ ორგანიზაციასა და ცირკს შორის მიმდინარეობდა, ცირკმა გადაწყვეტილება მიიღო, სპილოები, რომლებიც წარმოდგენაში მონაწილეობდნენ, ფლორიდას ნაკრძალში გაეგზავნა.