საქართველოს პრეზიდენტის თქმით, მაიკ პომპეოს საქართველოში ვიზიტი ისეთი ქვეყნების "რიგში", როგორებიც საფრანგეთი და ისრაელია, "იმის ნიშანია, რომ ამერიკა ჩვენს გვერდით დგას". ამის შესახებ სალომე ზურაბიშვილმა ამერიკის სახელმწიფო მდივანთან შეხვედრის შემდეგ განაცხადა. მის კომენტარს პრეზიდენტის ადმინისტრაციის პრესსამსახური ავრცელებს.

"ეს იყო შეხვედრა, რომელიც კიდევ ერთხელ ადასტურებს, თუ რამდენად ახლოს ვართ ამერიკა და საქართველო, რამდენად მყარია ამერიკის მხარდაჭერა საქართველოსთვის, ამ რეგიონისთვის, მით უმეტეს, დღეს, როცა ამ რეგიონში ცვლილებები მიმდინარეობს, ამერიკის დღევანდელი გადაწყვეტილება, რომ ჩამოსულიყო ამერიკის სახელმწიფო მდივანი იმის მერე, რაც საფრანგეთში და ისრაელამდე... ანუ მისი ერთ-ერთი მთავარი პარტნიორი და ევროპაში ერთ-ერთი მთავარი მოკავშირე, ამ რიგში რომ ჩასვა საქართველო, ეს იმის ნიშანია, რომ ამერიკა ჩვენს გვერდით დგას. მე ამისთვის მადლობა გადავუხადე", — თქვა ზურაბიშვილმა.

პრეზიდენტის განცხადებითვე, "ძალიან მნიშვნელოვანია ის, რომ სტრატეგიულად ამერიკა ამ რეგიონში არის ჩვენი მხარდამჭერი და იცის, რომ საჭიროა, უფრო აქტიურად იყოს ჩართული ამ რეგიონში".

ამასთან, სალომე ზურაბიშვილმა ასევე აღნიშნა, რომ კორონავირუსის კრიზისის ფონზე, მნიშვნელოვანია ამერიკის შეერთებული შტატების ეკონომიკური დახმარებაც.

საქართველოში ოფიციალური ვიზიტით ამერიკის შეერთებული შტატების სახელმწიფო მდივანი, მაიკ პომპეო იმყოფება. ის თავდაპირველად პრეზიდენტს სალომე ზურაბიშვილს შეხვდა, შემდეგ კი, პრემიერმინისტრ გიორგი გახარიას შეხვდა. შეხვედრა გაიმართა კათოლიკოს-პატრიარქ ილია მეორესთანაც. ამ წუთებში, პომპეო არასამთავრობო ორგანიზაციებთან მართავს შეხვედრას. აშშ-ის სახელმწიფო მდივანს არ აქვს დაგეგმილი შეხვედრები ოპოზიციასთან. ამ დროისთვის, ოპოზიცია რუსთაველის გამზირზე მდუმარე აქციის მართავს.

მაიკ პომპეო საქართველოს დღეს, 18 ნოემბერს დატოვებს.