ევროპული საქართველოს ერთ-ერთმა ლიდერმა, გიგი უგულავამ განაცხადა, რომ ჭირვეულის მორჯულების პირველმა ეტაპმა წარმატებით ჩაიარა, ამიტომ შაბათს აქციაზე ისევ იკრიბებიან. ეს იყო შეფასება იმ შეხვედრისა, რომელიც 12 ნოემბერს ოპოზიციას, ხელისუფლებასა და საერთაშორისო პარტნიორებს შორის გაიმართა.

"უბრალოდ, აქამდე ხელისუფლება ჭირვეულობდა, მხოლოდ დიალოგზე საუბრობდა, როგორც ვერბალურ ფორმაზე. კობახიძისგან არ ისმოდა, კობახიძე არანაირ დიალოგს არ ითხოვს, პირდაპირ დახვრეტას ითხოვს ჩვენსას. ეს პროცესი იმიტომ დაიწყო, რომ ხალხის პროტესტია ქუჩაში. საბოლოო ჯამში ჭირვეულის მორჯულების პირველმა ეტაპმა ჩაიარა წარმატებით, ამიტომ, მეგობრებო, შაბათს 15:00 ვიკრიბებით. ქუჩის პროტესტი გაგრძელდება, აბა, ამ დიალოგს გაგიწელავენ მეორედ მოსვლამდე", — განაცხადა გიგი უგულავამ.

უგულავას თქმით, ამ შეხვედრაში ახალი არის პროცესი, მაგრამ რითი დამთავრდება, უცნობია. მანვე აღნიშნა, რომ ამ შეხვედრის ინიციატივა პარტნიორებს ეკუთვნოდათ.

"მოგეხსენებათ, არა არის დაფარული, რომელი არა გაცხადდეს, მაგრამ ამ შემთხვევაში არც დაფარული რამე არსებობს და არც განცხადება სჭირდება. ჩვენი პოზიცია რასაც საჯაროდ ვამბობთ, იმას ვამბობთ ელჩებთანაც. აბა რა გგონიათ, გარეთ სხვას ვლაპარაკობთ და შიგნით სხვას? ჩვენი პოზიცია ვუთხარით. განსხვავება რა არის გუშინდელსა და დღევანდელ დღეს შორის — ფორმაშია განსხვავება. იმის გამო, რომ შუაში ელჩები სხედან; იმის გამო, რომ ბატონმა თალაკვაძემ ინება და მობრძანდა, საუბრის ფორმა მისცა, ინსტიტუციონალიზაცია მოახდინა. მან ფორმალურად მოისმინა სრულიად ოპოზიციის პოზიცია. ჩაიწერა, რატო იწერდა, რა, არ იცის?ყოველდღე ესმის ფანჯრების ქვემოდან შეძახილი", — განაცხადა გიგი უგულავამ.

გიგი უგულავამ აღნიშნა, რომ ამ პარლამენტში შესვლისა და არჩევნების ლეგიტიმურობის არცნობასთან დაკავშირებით ოპოზიციის ერთიანობას საფრთხე არ ემუქრება.

პოლიტიკური პარტიის ლიდერები აშშ-ს ელჩ კელი დეგნანს შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრიდან პირველი, ლეიბორისტული პარტიის ლიდერი, შალვა ნათელაშვილი გამოვიდა, რომელმაც თქვა, რომ ოპოზიცია ისევ ერთიანია, მოთხოვნები კი უცვლელი. იგივენაირი შეფასებები ჰქონდათ ოპოზიციის სხვა ლიდერებსაც. პარტია მოქალაქეების ლიდერმა, ალეკო ელისაშვილმა განაცხადა, რომ შეხვედრა არ ნიშნავს, რომ მოლაპარაკებები აუცილებლად შეთანხმებით დასრულდება. რაც შეეხება, არჩილ თალაკვაძეს მან შეხვედრა "პოზიტიურად" შეაფასა და აღნიშნა, რომ დიალოგის დაწყება პოზიციების დაახლოებას ემსახურება.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე ზეგ, 14 ნოემბერსაა დაგეგმილი.