27 იანვარს ერთ ადამიანს ძალიან გაუმართლებს: მას საშუალება მიეცემა, მსოფლიოში ერთ-ერთ ყველაზე პოპულარულ მსახიობთან, ჯულია რობერტსთან და U2-ს სოლისტ ბონოსთან ერთად ჩაი მიირთვას.

თუმცა ეს ყველაფერი არ არის. ის, ვინც RED-ის შიდსის წინააღმდეგ ბრძოლის კამპანიაში ჩაერთვება და აუქციონზე 10 000 დოლარად შეფასებულ ბილეთს შეიძენს, ჩაის ცერემონიასთან ერთად U2-ს კონცერტზე VIP ბილეთსაც გამოჰკრავს ხელს.

ფოტო: RED

იმ შემთხვევაში, თუ შედარებით მცირე შემოწირულობის გაკეთება გირჩევნიათ, სხვა პრიზებიც არსებობს. $100-ად მიიღებთ შანსს, საპატიო მაისური ატაროთ, $3500-ად კი ჯულია რობერტსის ავტოგრაფით დამშვენებული ლამაზმანის DVD-ს მოგებას შეძლებთ.

კამპანიის შესახებ ბონომ და ჯულიამ ჯიმი კიმელის შოუშიც ისაუბრეს.

RED-ის მთავარი მიზანი აფრიკაში შიდსის დამარცხებაა. ყოველდღიურად 400 ბავშვი იბადება შიდსით. ვარსკვლავების ძალისხმევით შეგროვებული თანხა სწორედ ამ პრობლემას შეებრძოლება და დედისგან ბავშვის დაინფიცირებისთვის ხელისშემშლელ მედიკამენტს მოხმარდება.

როგორც ბონო და ჯულია ამბობენ, არ არსებობს პრობლემა, რომელიც ერთად ჩაის დალევითა და საუბრით ვერ გადაიჭრება.