კომპანია Wolt-ში აცხადებენ, რომ კურიერს, რომელმაც კლიენტს პირად ნომერზე მიწერა, სამსახურიდან არ გაათავისუფლებენ. როგორც კომპანიაში ამბობენ, კურიერს 10 დღით მიტანის სერვისის განხორციელების უფლება შეეზღუდება, რის შემდეგაც ტრენინგი და ტესტირება ჩაუტარდება.

Wolt-ში ამბობენ, რომ მომხმარებლის უფლებების დარღვევაზე მათი რეაქცია უმკაცრესი იქნებოდა, რომ არა საზოგადოების დიდი ნაწილის მოთხოვნა, რომ კურიერთან თანამშრომლობა გაეგრძელებინათ. როგორც ისინი ამბობენ, აღნიშნული კურიერი სამსახურში დაბრუნებას, მხოლოდ ტესტირების წარმატებით გავლის შემდეგ შეძლებს.

"ასევე, ვითვალისწინებთ აღნიშნულ კურიერთან ხანგრძლივ თანამშრომლობას, რომლის დროსაც არცერთ გადაცდომას ადგილი არ ჰქონია", — ნათქვამია Wolt-ის განცხადებაში.

კომპანიაში აცხადებენ, რომ მომხმარებლის პირადი ინფორმაციის არამიზნობრივად გამოყენებისას, მათ თავდაპირველად დაბლოკეს კურიერი და გაესაუბრნენ მომხმარებელესაც.

გარდა ამისა, Wolt-ში ამბობენ, რომ კურიერები არა მათი თანამშრომლები, არამედ დამოუკიდებელი მეწარმე სუბიექტები არიან. მუშაობის დაწყებამდე კი ისინი ტრენინგსებსა და ტესტირებას გადიან. ამასთან კომპანიაში განმარტავენ, რომ მომხმარებლის პერსონალური ინფორმაცია პარტნიორი კურიერისთვის ხელმისაწვდომია მხოლოდ შეკვეთის მიტანის პროცესში. შეკვეთის მიტანის დასრულებისთანავე მომხმარებლის პერსონალური მონაცემები კურიერისთვის პროგრამულად ხელმიუწვდომელია:

"ჩვენ გადავხედავთ პარტნიორი კურიერებისთვის მომხმარებელთა მონაცემების დაცვის შესახებ ინფორმაციის მიწოდების პროცედურას, ასევე ტრენინგის შინაარსსა და ტესტირების პროცესს".

სოციალურ ქსელში ერთ-ერთი მომხმარებელი ამბობდა, რომ შეკვეთის მიტანის შემდეგ ვოლტის კურიერმა მასთან პირად ნომერზე კომუნიკაცია სცადა. როგორც ქალის მიერ გასაჯაროებულ სქრინში ჩანს, კურიერმა მისწერა "სხვათა შორის ძალიან კარგად გამოიყურებით".