ევროპული საქართველოს ლიდერმა, დავით ბაქრაძემ, პარტიის იმერეთის მაჟორიტარობის კანდიდატებთან, აკაკი ბობოხიძესთან, გიგი წერეთელთან და სერგო რატიანთან ერთად ქუთაისში, ყოფილი პარლამენტის შენობის წინ, მოსახლეობათან შემაჯამებელი შეხვედრა გამართა.

შეხვედრას ასევე ესწრებოდა ევროპული საქართველოს წევრი, გიორგი კანდელაკი, რომელიც იმერეთში პარტიულ კონკურენციაში მონაწილეობს.

ევროპული საქართველოს მაჟორიტარობის კანდიდატის ტყიბულის, თერჯოლის, ზესტაფონისა და ბაღდათის ოლქში, გიგი წერეთელის თქმით, ის უიმედობა, უპერსპექტივობა, სიღარიბე და გაზრდილი კრიმინალი, რომელიც ბიძინა ივანიშვილის ხელისუფლებამ მოუტანა ქვეყანას, უნდა შეიცვალოს 31 ოქტომბერს გარდამტეხი ცვლილებებით.

"ასიათასობით ადამიანი ამ არჩევნების შემდეგ ელოდება იმას, რომ ეს სიღარიბე, ეს ვითარება რომელიც დღეს არის უმუშევრობასთან დაკავშირებით, კრიმინალის ზრდა, კორონავირუსის საფრთხე და სხვა, რაზეც არის პასუხისმგებელი დღევანდელი ხელისუფლება, კმაყოფილი ხელისუფლება, უნდა შეიცვალოს და სწორედ ეს არის გარდამტეხი ცვლილებები, რომლებსაც თქვენთან ერთად განვახორციელებთ აუცილებლად.

სხვა გზა და ხსნა საქართველოს არ აქვს, მხოლოდ წარმატება ამ არჩევნებზე და შემდეგ ახალი მთავრობით, ერთიანად, ხალხზე მზრუნველი მთავრობით და არა თავის თავზე მოფიქრალი მთავრობით, აუცილებლად გატარდება ის ცვლილებები, რაც საქართველოს წარმატებას სჭირდება", — განაცხადა წერეთელმა.