ინფორმაციის თავისუფლებისა და განვითარების ინსტიტუტი (IDFI) 2016 წელს თბილისის მერიის ნებართვებით მოჭრილი ხეების სტატისტიკას აქვეყნებს, რომლის მიხედვით, წინა წლებთან შედარებით, გასულ წელს, მინიმუმ 5-ჯერ მეტ ხეს მიენიჭა დაზიანებულის სტატუსი.

მათივე ცნობით, ნებართვების საფუძველზე მოჭრილი ხეების მთლიანი რაოდენობა არ გაზრდილა. აქედან გამომდინარე, ორგანიზაცია ეჭვქვეშ აყენებს იმას თუ რამდენად სამართლიანად ენიჭებათ ხეებს დაზიანებულის სტატუსი.

IDFI-მ, საცხოვრებელი კორპუსებისა და კომერციული ობიექტების მშენებლობაზე, ხეების მოსაჭრელად გაცემული ნებართვებისა და უნებართვოდ მოჭრილი ხეების რაოდენობის შესახებ ინფორმაცია მერიიდან გამოითხოვა.

მშენებლობის ნებართვების სტატისტიკა

ყველაზე მეტი მშენებლობის ნებართვა გაიცა 2011 წელს - 375. 2012 წელს ეს ციფრი 142-მდე შემცირდა, თუმცა 2013 წლის შემდეგ გაცემული ნებართვების რაოდენობა კვლავ იზრდება და 2015 წელს მათი რიცხვი 334-ს გაუტოლდა. 2016 წლის პირველი 8 თვის მონაცემებით კი გაიცა 255 ნებართვა.

თბილისის არქიტექტურის სამსახურისგან მიღებული ინფორმაციით, 2011-2016 წლებში სულ გაიცა 1,747 ნებართვა საცხოვრებელი კორპუსისა და მრავალფუნქციური ობიექტის მშენებლობაზე.

ხის მოჭრაზე გაცემული ნებართვები

IDFI წერს, რომ მშენებლობის მიზნით ხეების მოჭრაზე გაცემული ნებართვების შესახებ დამუშავებული სტატისტიკური მონაცემების ნაცვლად, თბილისის მერიამ წარმოადგინა ეკოლოგიისა და გამწვანების საქალაქო სამსახურის მიერ 2011-2016 წლებში გაცემული ნებართვების ასლები.

IDFI-ის მიერ დამუშავებული დოკუმენტაციის მიხედვით, 2013 წლიდან 2016 წლის 16 აგვისტომდე სულ გაიცა 583 ნებართვა 3,552 ხის მოჭრაზე, საიდანაც დაავადებული იყო 827 ხე.

მონაცემების ანალიზიდან ირკვევა, რომ 2016 წელს ხეების მოჭრის შესახებ გაცემულ ნებართვებში, წინა წლებთან შედარებით, 5-ჯერ გაიზარდა დაზიანებული ხეების რაოდენობა.

კერძოდ, 2016 წელს (16 აგვისტოს ჩათვლით) ნებართვის საფუძველზე მოჭრილი 709 ხიდან 500-ს ჰქონდა მინიჭებული დაზიანებულის სტატუსი, 2015 წელს 1,088 ხიდან დაზიანებული იყო 111, 2014 წელს 809 ხიდან - 80, ხოლო 2013 წელს 946-დან - მხოლოდ 36.

IDFI-ის მიერ შესწავლილი 2013-2016 წლებში გაცემული 583 ნებართვიდან 392 შემთხვევაში მითითებულია, რომ ხეების მოჭრაზე ნებართვა გაიცა უშუალოდ მშენებლობასთან დაკავშირებით.