ევროპული საქართველოს ერთ-ერთმა ლიდერმა, ზურაბ ჭიაბერაშვილმა ისაუბრა ცხელი ხაზის გამართულობის, პირბადის ტარების აუცილებლობისა და საკარანტინო ზონებში იმ ადამიანების გადაყვანის აუცილებლობაზე, რომლებიც რისკ-ჯგუფში შედიან და არ აქვთ თვითიზოლაციის შესაძლებლობა.

"ჩემ უკან არის 112. აქ ვართ ზუსტად იმიტომ, რომ დიდი ცოდნა არ სჭირდებოდა იმის გათვლას, როდესაც დაიწყებოდა ის ტალღა, რისი მომსწრენიც ახლა ვართ, გადაიტვირთებოდა ცხელი ხაზი და ამას სჭირდებოდა ელემენტალური მენეჯმენტი. მე ახლა წარმოგიდგენთ დაუყონებლივ გადასადგმელი ნაბიჯების გეგმას, ის რაც გასაკეთებელია:

  • ცხელი ხაზიც და პირველადი ჯანდაცვის რგოლის გაძლიერება არის სწრაფი რეაგირებისთვის აუცილებელი. საზოგადოებაში ჩვენ ვხედავთ მომატებულ შფოთვას, როდესაც სეზონური გრიპის პირობებში ადამიანებმა არ იციან, კორონავირუსი სჭირთ, თუ ეს უბრალოდ სეზონური გრიპია. იმისათვის, რომ საზოგადოებამ შეინარჩუნოს სიმშვიდე, ამას სჭირდება სწრაფი რეაგირების მექანიზმი;
  • ასევე საჭიროა, რომ პირბადეების ტარება გახდეს სავალდებულო, რათა შევაჩეროთ გადაცემის სიჩქარე;
  • საჭიროა რისკი-ჯგუფში შემავალი ადამიანების დაცვა. აუცილებელია, რომ რისკ-ჯგუფში მყოფი ადამიანები, რომელთაც არ აქვთ თვითიზოლაციაში შესაძლებლობა, განთავსდნენ საკარანტინო სივრცეებში. ეს სივრცეები არა ინფიცირებულთა ჩასაკეტად, არამედ პირიქით, რისკ-ჯგუფში მყოფი ადამიანების დასაცავად უნდა გამოიყენებოდეს. ეს, რა თქმა უნდა, უნდა იყოს ნებაყოფლობითი".