საქართველოს მართმადიდებელი ეკლესიის პატრიარქი, ილია მეორე მიიჩნევს, რომ საღვთო ზნეობა იმდენად მაღალია, რომ მას ყველაზე დახვეწილი სახელმწიფო კანონებიც კი ვერ შეედრება. ამის შესახებ ილია II-ის საშობაო ეპისტოლეში წერია.

ეპისტოლეს თანახმად, ზოგიერთ ქვეყანაში, ზოგი სახელმწიფო კანონი ეწინააღმდეგება ზნეობრივ ნორმებს, ხოლო მედია და სოციალური ქსელები მათ პროპაგანდირებას ახდენენ:

"როგორც საღვთო, ისე სახელმწიფო კანონები რა თქმა უნდა, ზრუნავს ადამიანზე, მაგრამ მათში განსხვავებულობას წარმოშობს პიროვნების აღქმა და მასთან დაკავშირებული ხედვის პერსპექტივები.

ეს განსაკუთრებით ითქმის ისეთ ქვეყნებზე, სადაც ზოგიერთი სახელმწიფო კანონი ეწინააღმდეგება ზნეობრივ ნორმებს და მცდელობები აქვთ, ცოდვა ოფიციალურად ნებადართული გახადონ. პარალელურად ხდება ისიც, რომ ტელევიზია, მასმედია, სოციალური ქსელები… ამა თუ იმ უწესობას ხშირად მიმზიდველად და საინტერესოდ გვისახავენ და ხელს უწყობენ მათ პროპაგანდას." - წერია პატრიარქის საშობაო ეპისტოლეში.

აღნიშნული ეპისტოლე სამების საკათედრო ტაძარში წაიკითხეს. ღონისძიებას პირდაპირ ეთერში აშუქებს საქართველოს საზოგადოებრივი მაუწყებელი. ტაძარში იმყოფებიან საქართველოს მთავრობის წარმომადგენლები, მათ შორის პრემიერ-მინისტრი გიორგი კვირიკაშვილი.

7 იანვარს მართმადიდებელი ეკლესია ქრისტეს შობის დღესასწაულს აღნიშნავს.