ადამ მაკკეის Netflix-ის კომედია Don’t Look Up ბოლოდროინდელ კინოისტორიაში ერთ-ერთი ყველაზე ვარსკვლავებით დახუნძლული პროექტი გახდა.

პროექტს უკვე კარგა ხანია, რაც ჯენიფერ ლოურენსი შეუერთდა, თუმცა ახლა დადასტურდა, რომ ფილმში მის გვერდით ისეთი ცნობილი მსახიობები გამოჩნდებიან, როგორებიც არიან: ლეონარდო დიკაპრიო, ქეით ბლანშეტი, ტიმოთი შალამე, არიანა გრანდე, მეთიუ პერი, ჯონა ჰილი, რობ მორგანი, ჰიმეშ პატელი, ქიდ ქადი და ტომერ სისლეი. ფილმის სცენარისტიც და რეჟისორიც თვითონ მაკკეი იქნება.

როგორც აქამდე უკვე გახდა ცნობილი, Don’t Look Up-ში ლოურენსი ასტრონომის როლს ასრულებს. ის თავის პარტნიორთან ერთად აღმოაჩენს, რომ დედამიწას გიგანტური ასტეროიდი უახლოვდება, რომელიც მას გაანადგურებს. მეცნიერები მთელი ქვეყნის მასშტაბით ცდილობენ ხალხის გაფრთხილებას, თუმცა მოსახლეობას მათი ნათქვამი არც ადარდებს და მისი არც სჯერა.

"ძალიან მიხარია, რომ ჯენ ლოურენსთან ერთად ვიმუშავებ ამ ფილმზე. [ლოურენსი] ისაა, რასაც მე-17 საუკუნეში ხალხი 'დინამიტის აფეთქებას' უწოდებდა. ის ფაქტი კი, რომ Netflix-ისთვის ეს ფილმი მსოფლიო მასშტაბის კომედიაა, ჩემთვის და ჩემი გუნდისთვის თამასას საკმაოდ მაღლა წევს და მოტივაციას გვძენს", — თქვა მაკკეიმ.

მაკკეისა და ლოურენსს ფილმზე მუშაობა ჯერ კიდევ აპრილში უნდა დაეწყოთ, თუმცა კორონავირუსის პანდემიამ გეგმები შეცვალა. გადაღებების გადადებამ ვარსკვლავებით სავსე გუნდის შეკრების შესაძლებლობა გააჩინა, განსაკუთრებით კი ლეონარდო დიკაპრიოს შემომატებაში შეიტანა წვლილი. ოსკაროსანი მსახიობის სახელი Don’t Look Up-ის გარშემო თვეების განმავლობაში ტრიალებდა, თუმცა მის ჩართულობას დაკავებული განრიგი უშლიდა ხელს, მათ შორის მარტინ სკორსეზეს დრამა Killers of the Flower Moon.

ამ კვირაში Insider-თან ჩაწერილ ინტერვიუში მაკკეიმ თქვა, რომ Don’t Look Up მას ძალიან მოეწონა, რადგან ბოლოს დიკ ჩეინზე გადაღებული ბიოგრაფიული ფილმი Vice მძიმე ტვირთად დააწვა და კომედიაში დაბრუნება სურდა. მაკკეიმ კომედიურ ჟანრში მოღვაწეობა ისეთი ფილმებით დაიწყო, როგორებიცაა Anchorman და Talledega Nights: The Ballad of Ricky Bobby, თუმცა ის ამბობს, რომ მაყურებელი არ უნდა ელოდეს, რომ Don’t Look Up-იც ამ ფილმებივით შერეკილი იქნება.

"არ მგონია, რომ ეს Step Brothers-ისნაირი კომედია იქნება. მას უფრო რაღაც ისეთს შევადარებდი, რაც მაიკ ჯაჯის ნამუშევრებსა და Wag the Dog-ს შორისაა. მკაცრი და სახალისო სატირის გადაღება გვინდა", — თქვა მან.

ამავე თემაზე: