მსახიობი ხოაკინ ფენიქსი და რეჟისორი რიდლი სკოტი კვლავ ითანამშრომლებენ, რათა ახალი ეპიკური ისტორიული დრამა გადაიღონ.

მომავალი ფილმის სახელწოდებაა ჯარისკაცის ზურგჩანთა (Kitbag) და ის ნაპოლეონ ბონაპარტის შესახებ მოგვითხრობს: რევოლუციის გენერალი, რომელიც ფრანგთა ემპერატორი გახდა. გავრცელებული ინფორმაციის მიხედვით, ფილმის სათაური შემდეგი ფრაზიდან გამომდინარეობს: "ყოველი ჯარისკაცის ზურგჩანთაშია დამალული გენერლის ნივთები".

როგორც რიდლი სკოტის, ისე ხოაკინ ფენიქსის შემოქმედების მოყვარულებმა კარგად იციან, რომ თანამედროვე კინოსამყაროს ამ ორ ცნობილ ხელოვანს 2000 წელს გამოსული ასევე ეპიკური ისტორიული დრამა გლადიატორი აერთიანებთ: ფილმში ფენიქსი რომაელი იმპერატორი კომოდუსის როლს ასრულებს.

როგორც ჩანს, ის მალე კიდევ ერთი ცნობილი ისტორიული ფიგურის როლს მოირგებს.

ხოაკინ ფენიქსი ფილმში გლადიატორი.

ფოტო: Dreamworks

ჯარისკაცის ზურგჩანთის სიუჟეტი როგორც ნაპოლეონის რთული სამხედრო თუ პოლიტიკური ცხოვრების, ისე თავის ცოლთან, ჟოზეფინასთან ურთიერთობის შესახებაც მოგვითხრობს. სცენარზე დევიდ სკარპა იმუშავებს, რომელიც წარსულში ასევე რიდლი სკოტის ფილმის სამყაროს მთელი სიმდიდრე (All the Money in the World) სცენარისტი იყო.

აღსანიშნავია, რომ ეს ერთადერთი ახალი პროექტი არ არის, რომელზეც 82 წლის რეჟისორი რიდლი სკოტი მუშაობს: როგორც ცნობილია, მან ცოტა ხნის წინ დაასრულა ფილმზე The Last Duel მუშაობა, რომელშიც მეთ დეიმონი, ჯოდი კომერი, ბენ აფლეკი და ადამ დრაივერი მონაწილეობენ.

რაც შეეხება ხოაკინ ფენიქსს, ყველას გვახსოვს მისი წარმატება გასული წლის ერთ-ერთ ყველაზე გახმაურებულ ფილმში ჯოკერი მონაწილეობით: კაცის საუკეთესო როლისთვის ოსკარი მიიღო. სიახლეებია 45 წლის მსახიობის არა მხოლოდ კარიერაში, არამედ პირად ცხოვრებშიც: სექტემბრის ბოლოს ცნობილი გახდა, რომ ფენიქსი და რუნი მარა მშობლები გახდნენ.

გასათვალისწინებელია ის ფაქტიც, რომ ნაპოლეონის შესახებ მასშტაბური ფილმის გადაღება ლეგენდარულ რეჟისორ სტენლი კუბრიკსაც სურდა, თუმცა, სამწუხაროდ, ეს პროექტი ვერ განახორციელა. შესაბამისად, ორმაგად საინტერესოა, თუ როგორ შეასხამს ამ დამაინტრიგებელ იდეას რიდლი სკოტი ხოაკინ ფენიქსის დახმარებით.