საქართველოს პრემიერმინისტრის, გიორგი გახარიას თქმით, მას არ აინტერესებს დატოვა თუ არა პარტია სახელმწიფო უსაფრთხოების სამსახურის უფროსის ყოფილმა მოადგილემ, სოსო გოგაშვილმა. ასე გამოეხმაურა იგი გოგაშვილის ქართული ოცნებიდან წასვლას.

"საერთოდ არ მაინტერესებს, რა დატოვა, ან სად წავიდა სოსო გოგაშვილი, მიზეზი საერთოდ არ მაინტერესებს და არ ვიცი, საიდან უნდა ვიცოდე?", — განაცხადა გახარიამ.

დღეს, 7 ოქტომბერს ცნობილი გახდა, რომ სუს-ის უფროსის ყოფილმა მოადგილემ ქართული ოცნება დატოვა. მთავარ არხთან სატელეფონო საუბრისას გოგაშვილმა წასვლის მიზეზებზე არ ისაუბრა, თუმცა აღნიშნა, რომ პარტიის ლიდერმა ამის შესახებ იცის და მისი გადაწყვეტილება კარგად მიიღო.