წყალმომარაგების კომპანიის მიერ ჩატარებული გაფართოებული ლაბორატორიული კვლევის შედეგებით გორში სასმელი წყალი დადგენილ ნორმებს აკმაყოფილებს.

კომპანიის ინფორმაციით, წყლის სინჯები კომპანიის ლაბორატორიის მიერ კომბინატის დასახლების რამდენიმე ქუჩაზე აიღეს. მათივე ცნობით, გორში არსებული წყლის სათავე ნაგებობა და საქლორატოროს მიმდებარე ტერიტორია, საიდანაც ხდება ქალაქის დიდი ნაწილის წყალმომარაგება, შემოსაზღვრული და სტანდარტების შესაბამისად არის დაცული.

კომპანიის თქმით, აღნიშნულ ტერიტორიაზე მოწყობილი წყლის ჭები დახურულია, შესაბამისად, სათავე ნაგებობა და საქლორატორო ობიექტების შიდა და გარე პერიმეტრები მკაცრად კონტროლდება.

ლაბორატორიული კვლევის პირველადი მონაცემებით, გორში სასმელი წყალი დადგენილ ნორმებს აკმაყოფილებდა. ამის შესახებ ინფორმაცია გაერთიანებული წყალმომარაგების სააგენტომ გაავრცელა.

ადგილზე იმყოფებოდა წყალმომარაგების კომპანიის ტექნიკური დირექტორი ირაკლი ნაფეტვარიძე, რომელმაც განაცხადა, რომ კომპანია გორში ყოველდღიურად იღებს სინჯებს სხვადასხვა ლოკაციიდან. მისივე თქმით, გასულ დღეებში აღებული სინჯების მონიტორინგის მიხედვით, სასმელი წყალი დადგენილ ნორმებს სრულად აკმაყოფილებდა.

გარდა ამისა, წყლის სინჯები აიღო სურსათის ეროვნულმა სააგენტომაც. როგორც სურსათის ეროვნულ სააგენტოში On.ge-ს უთხრეს, ამ ეტაპზე სინჯები ლაბორატორიაში კვლევისთვისაა გადაგზავნილი და უახლოეს მომავალში პასუხები ცნობილი გახდება.

გორის კომბინატის დასახლებაში 60-მდე ადამიანი მოიწამლა. ადგილობრივები მოწამვლას წყალს აბრალებენ.