რესპუბლიკური პარტიის ლიდერის დავით უსუფაშვილის თქმით, თუკი პრეზიდენტთან პიროვნული ჭიდილი ან საკონსტიტუციო ცვლილებების მომზადების პარალელურად ტოტალური "ოცნებური კონტროლის" ტენდენციები გაგრძელდა, შესაძლოა პოლიტიკური კრიზისი დაიწყოს. ამის შესახებ, უსუფაშვილმა გაზეთ კვირის პალიტრასთან ექსკლუზიურ ინტერვიუში განაცხადა.

მისივე თქმით, პრეზიდენტის უფლებამოსილება აუცილებლად განსასაზღვრია, ხოლო, მსგავსი ტიპის ცვლილებები ფართო კონსენსუსით უნდა გადაწყდეს:

"მთელი ცხოვრება ვიყავი და ვრჩები კლასიკური საპარლამენტო მმართველობის მომხრედ, როცა პრეზიდენტი სახელმწიფოს მეთაურია და იგი პირდაპირი არჩევნებით არ აირჩევა. პრეზიდენტს არსენალში აქვს სამართლებრივ-პოლიტიკური ნაბიჯების ერთობლიობა, რომლითაც შესაძლოა ქართული ოცნების გაუაზრებელი მცდელობა ამ გუნდსვე შემოუბრუნოს ბუმერანგივით".

უსუფაშვილის თქმით, თუკი ქართულმა ოცნებამ ერთპიროვნულად გადაწყვიტა, რომ პრეზიდენტი არაპირდაპირი გზით უნდა აირჩეს, ცვლილებების საარჩევნო სისტემაში ოფიციალურად გაფორმებამდე კონსტიტუციით მინიმუმ სამი თვეა განსაზღვრული.

ინტერვიუში მან მოვლენების სავარაუდო განვითარების შესახებ ისაუბრა:

"რატომ არ უნდა გავთვალოთ, რომ პრეზიდენტმა ასეთ ვითარებაში, თანაც, იმ ფონზე რომ საპრეზიდენტო ვადის ამოწურვამდე ერთი წელი რჩება, ქართველ ხალხს მიმართოს: ოცნება გართმევთ პრეზიდენტის პირდაპირი წესით არჩევის უფლებას, მე უძლური ვარ ამ ცვლილებას წინააღმდეგობა გავუწიო თუმცა სანამ ცვლილება ძალაში შესულა გაძლევთ შანსს პრეზიდენტი კიდევ ერთხელ თავად აირჩიოთ და კიდევ 5 წელი, 2022 წლამდე გყავდეთ თქვენს მიერ არჩეული პრეზიდენტი. ამასობაში, 2020 წელს თავად პარლამენტია ასარჩევი და ვნახოთ ის მომავალი პარლამენტი წაგართმევთ თუ შეგინარჩუნებთ თქვენი პრეზიდენტის ყოლის უფლებასო.

თუ გიოგი მარგველაშვილი გადადგა, კონსტიტუციით დადგენილ 40 დღეში ახალი არჩევნები უნდა ჩატარდეს. თუ ასეთ პირობებში გიორგი მარგველაშვილი ან ვინმე სხვა, არასახელისუფლებო კანდიდატი არჩევნებში გაიმარჯვებს, მომავალი პრეზიდენტი პოლიტიკური წონის თვალსაზრისით სერიოზული ფიგურა გახდება. შესაბამისად, ოცნებამ შეიძლება მიიღოს გაცილებით ძლიერი პრეზიდენტი და პოლიტიკური პრობლემებიც სწორედ ამის შემდეგ დაიწყება".

უსუფაშვილის ვარაუდით, ეს ივნისში შეიძლება მოხდეს, როცა უკვე საკონსტიტუციო კომისია განსაზღვრავს ცვლილებების პროექტს.