საქართველოს მეოთხე პრეზიდენტი, გიორგი მარგველაშვილი ამბობს, რომ არ ნანობს აგრარული უნივერსიტეტისთვის აკრედიტაციის შეწყვეტის საქმეს და აღნიშნავს, რომ კანონი ყველასთვის საერთოა. ამის შესახებ მან TV პირველის ეთერში ისაუბრა.

"არ ვნანობ და ყოველთვის ამ პოზიციაზე ვიყავი, რომ კანონი ყველასთვის საერთოა. მოგწონთ თქვენ ის ადამიანი, თუ არ მოგწონთ. ეს იყო, რის გამოც მე "ოცნებასთან" მქონდა დაპირისპირება, რომ მიმაჩნდა, კანონი ყველასთვის ერთი და იგივეა. [კახა] ბენდუქიძე არის გარდაცვლილი ადამიანი, ამიტომ მე მიჭირს ამაზე საუბარი. რაც შეეხება იმ შემთხვევას, მინდა ყველას გითხრათ, აბსოლუტურად არ ვნანობ ამას", — ამბობს მარგველაშვილი.

გიორგი მარგველაშვილის განათლების მინისტრობის დროს, 2013 წელს განათლების ხარისხის განვითარების ეროვნული ცენტრის ავტორიზაციის საბჭომ აგრარული უნივერსიტეტისთვის ავტორიზაციის გაუქმების გადაწყვეტილება მიიღო. საბჭოს მიერ დასახელებულ მიზეზებს შორის იყო ის ბრალდებები, რომ უნივერსიტეტმა ორ სტუდენტს დებულების დარღვევით მისცა ბაკალავრის ხარისხი; ასევე შესაბამისი აკრედიტაციის გარეშე განახორციელა რამდენიმე სადოქტორო პროგრამა; კონკურსის გარეშე აიყვანა აკადემიური პერსონალის რამდენიმე თანამშრომელი და წესდებაში რამდენიმე ისეთი დებულება ჰქონდა შეტანილი, რომლებიც კანონმდებლობას ეწინააღმდეგება და სტუდენტების უფლებებს არღვევს.

აგრარული უნივერსიტეტის ხელმძღვანელობამ და მისმა სტუდენტებმა დაგმეს ეს გადაწყვეტილება და მას პოლიტიკურად მოტივირებული უწოდეს, რომელიც კახა ბენდუქიძის წარსულ პოლიტიკურ საქმიანობას უკავშირდებოდა.

ორ კვირაში აგრარულ უნივერსიტეტს ავტორიზაცია აღუდგინეს. ავტორიზაციის საბჭოს წევრებმა გადაწყვეტილების მოტივად დაასახელეს მაღალი საჯარო ინტერესი იმ აგრარული სპეციალობების მიმართ, რომელთა სწავლება სხვა უმაღლეს დაწესებულებებში არ მიმდინარეობს. საბჭოს წევრებმა დასძინეს, რომ აგრარულ უნივერსიტეტში დარჩენილი ხარვეზების აღმოფხვრის მიზნით, განათლების ხარისხის განვითარების ეროვნული ცენტრი უფლებამოსილია აგრარულ უნივერსიტეტში მონიტორინგი განახორციელოს.