სომხეთის საგარეო საქმეთა სამინისტროს განცხადებით, ქვეყანა მზად არის, ეუთოს მინსკის ჯგუფის ქვეყნებთან ცეცხლის შეწყვეტის თაობაზე ითანამშრომლოს. უწყების ინფორმაციით, სომხეთი მთიანი ყარაბაღის კონფლიქტის მშვიდობიანად მოგვარების ერთგული რჩება.

"მივესალმებით ფაქტს, რომ მინსკის ჯგუფის თანათავმჯდომარეები მთიანი ყარაბაღის კონფლიქტის ზონაში ძალის გამოყენებას მკაცრად გმობენ. სომხეთი მუდმივად გმობდა და უარყოფდა ძალის გამოყენებას აზერბაიჯანის მიერ, ასევე, თურქეთის პირდაპირ ჩართულობას სომხეთისა და მთიანი ყარაბაღის წინააღმდეგ არსებულ სამხედრო მოქმედებებში", — ამბობენ უწყებაში.

სამინისტროს განცხადებით, აგრესია მთიანი ყარაბაღის წინააღმდეგ დაუყოვნებლივ უნდა შეწყდეს, რადგან მათი თქმით, თურქეთისა და აზერბაიჯანის ერთობლივი აგრესიული მოქმედებები როგორც რეგიონალურ უსაფრთოხებას, ასევე, მშვიდობას უშლის ხელს და ფართომასშტაბიანი ომის რისკს ქმნის.

რა ხდება ყარაბაღში


მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომეთში და არცახში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.