5 წლის ბავშვთან გარყვნილ ქმედებაში ბრალდებული, რომელიც გურჯაანის რაიონულმა სასამართლომ გაამართლა, სააპელაციომ დამნაშავედ ცნო. მას 13 წლით თავისუფლების აღკვეთა მიესაჯა.

სააპელაციო სასამართლომ პროკურატურის მიერ წარდგენილი მტკიცებულებების საფუძველზე ბრალდებული დამნაშავედ ცნო 138-ე მუხლის მესამე ნაწილის "გ" ქვეპუნქტით (სექსუალური ხასიათის სხვაგვარი ქმედება, ძალადობით და დაზარალებულის უმწეობის გამოყენებით) გათვალისწინებული დანაშაულის ჩადენაში.

გურჯაანის რაიონულმა ბრალდებული 13 მაისს გაამართლა. მოსამართლის გადაწყვეტილებას დაზარალებულის ოჯახის წევრების მხრიდან პროტესტი მოჰყვა, მათ სასამართლოს შენობაში შეღწევა რამდენჯერმე სცადეს.

პროკურატურა აცხადებდა, რომ გადაწყვეტილებას გაასაჩივრებდა. ბრალდების მხარე ამტკიცებდა, რომ ამ სისხლის სამართლის საქმეზე პროკურორებმა უტყუარი მტკიცებულებები წარადგინეს, რითაც დასტურდებოდა, რომ კაცმა დანაშაული ჩაიდინა.

შემთხვევა ლაგოდეხში მოხდა. 10 აპრილს ცნობილი გახდა, რომ 5 წლის ბავშვთან გარყვნილ ქმედებაში ბრალდებული კაცი აღკვეთის ღონისძიების ვადის გასვლის გამო გაათავისუფლეს. საერთო სასამართლოების პრესსამსახურმა მაშინ განმარტა, რომ ბრალდებულს 9 თვით წინასწარი პატიმრობა ჰქონდა შეფარდებული, დროის ამოწურვის შემდეგ კი, მას აღკვეთის ღონისძიება 10 000 ლარიანი გირაოთი შეეცვალა.