ეხო კავკაზას ცნობით, ოკუპირებულ საბერიოში გატაცებული ადგილობრივი ბიზნესმენი, ჯემალ სოსელია თავისუფალია. გამოცემა კავკაზსკი უზელი კი გატაცებულის ახლობლებზე დაყრდნობით წერს, რომ სოსელია თავის გამტაცებლებს გაექცა.

"ჩემი ინფორმაციით, მას ნება დართეს, რომ გაქცეულიყო, რადგან უკვე იცოდნენ, ვინ გაიტაცა ის", — განუცხადა კავკაზსკი უზელს ჯემალ სოსელიას ნათესავმა, აფხაზმა ჟურნალისტმა, როინ აგრბამ.

საქართველოს შინაგან საქმეთა სამინისტროში On.ge-ს განუცხადეს, რომ სოსელიას საქმეზე ისინი გამოძიებას ისევ სისხლის სამართლის კოდექსის 143 მუხლით აწარმოებენ, რაც თავისუფლების უკანონო აღკვეთას გულისხმობს. უწყებაში ამბობენ, რომ სხვა დამატებითი ინფორმაცია არ აქვთ.

ოკუპირებული აფხაზეთის გალის რაიონის სოფელ საბერიოში ადგილობრივი ბიზნესმენი ჯემალ სოსელია ხუთ სექტემბერს გაიტაცეს. გალის ადმინისტრაციის ყოფილი დე ფაქტო ხელმძღვანელი, თემურ ნადარია მომხდარში ქართულ მხარეს ადანაშაულებდა.

ეხო კავკაზას ინფორმაციით, 58 წლის ბიზნესმენი, ჯემალ სოსელიას ავტომობილი ოთხმა შეიარაღებულმა პირმა ხუთ სექტემბერს გააჩერა, რის შემდეგაც ისინი შიგნით ჩასხდნენ და სოსელია აიძულეს, ენგურჰესისკენ — საოკუპაციო ხაზის მიმართულებით წაეყვანა მანქანა. ეხო კავკაზას ინფორმაციით, გზაზე სოსელიამ ავტომობილი სხვა მიმართულებით იმ იმედით შეაბრუნა, რომ მას ვინმე შეამჩნევდა და დაეხმარებოდა. თუმცა, როცა თავდამსხმელებმა მანქანის სხვა გზით სვლა შეამჩნიეს, სოსელიას გონების დაკარგვამდე სცემეს. ამის მოწმე კი ენგურჰესის ორი თანამშრომელი გახდა, რომლებიც ადგილზე დახმარების აღმოსაჩენად მივიდნენ. წყარო იტყობინება, რომ თავდამსხმელებმა თვითმხილველებსაც სცემეს და ტელეფონები წაართვეს. სოსელია კი ისევ მანქანაში ჩასვეს და ტყვარჩელის მიმართულებით წაიყვანეს. ეხო კავკაზას წყარო ირწმუნება, რომ თავდამსხმელები მეგრულ-ქართულად საუბრობდნენ. მისი ცნობითვე, დასისხლიანებული მანქანა ტყვარჩელის რაიონში, აჭაკაში მიმავალ გზაზე აღმოაჩინეს.

სოსელია რუსეთის მოქალაქეა, რომელიც სოჭში ცხოვრობს, სადაც ბიზნესსაქმიანობას ეწევა. ცოტა ხნის წინ კი, სოფელ საბერიოში აიშენა სახლი და მშობლიურ სოფელში პერიოდულად ჩადიოდა.