პირველი ოქტომბრიდან, სპეციალური საგანმანათლებლო საჭიროების მქონე მოსწავლეებისთვის, აჭარის გარდა ყველგან, სპეციალურ ოთახებში მასწავლებლებთან შეხვედრა დაიშვება. ამის შესახებ განათლების მინისტრმა, მიხეილ ჩხენკელმა საკოორდინაციო საბჭოს სხდომის დასრულების შემდეგ განაცხადა.

"საშუალება ექნებათ, სკოლის ტერიტორიაზე, სპეციალურ ოთახში, რესურს ოთახში შეხვდნენ სპეცმასწავლებელს. ეს იქნება ერთი-ერთზე შეხვედრები, იქნება სპეციალური გრაფიკი, რომელსაც სკოლები შეათანხმებენ მშობლებთან", — განაცხადა მან.

პირველ ოქტომბერს ქალაქების ნაწილში სწავლა საკლასო ოთახებში აღდგება, თუმცა სხვადასხვა პრინციპით. კერძოდ, თბილისში, ქუთაისში, რუსთავსა და ზუგდიდში საკლასო ოთახებში სწავლა აღდგება მხოლოდ პირველიდან მეექვსე კლასის ჩათვლით მოსწავლეებისთვის. ფოთსა და გორში კი ყველასთვის, პირველიდან მეთორმეტე კლასის ჩათვლით. რაც შეეხება აჭარის რეგიონს სწავლა კვლავ დისტანციურად გაგრძელდება.

ამავე თემაზე: