Fantastic Beasts 3-ის მსახიობმა ედი რედმეინმა დაადასტურა, რომ ფილმის გადაღებები დაიწყო. ფილმში რედმეინთან ერთად დაბრუნდებიან ჯონი დეპი, კეტრინ უოტერსონი, ჯუდ ლოუ და ეზრა მილერი. ფილმის რეჟისორი დევიდ იეტსი იქნება, რომელმაც ფრენჩაიზის პირველი ორი ნაწილი გადაიღო. სცენარის დაწერაში ჯოან როულინგმაც მიიღო მონაწილეობა.

ფრენჩაიზის პირველმა ფილმმა დიდი წარმატება მოიპოვა და სრულიად ახლებურად წარმოაჩინა ჰარი პოტერის სამყარო, თუმცა მისი გაგრძელება კრიტიკული და კომერციული თვალსაზრისით შედარებით იმედგამაცრუებელი იყო. სავარაუდოდ, სწორედ ამან გამოიწვია მესამე ფილმზე მუშაობის გადადება.

ჯადოსნური ცხოველების ფრენჩაიზისთვის ხუთი ფილმის გადაღება იგეგმება, მათგან მესამეს კი უკვე რამდენჯერმე მოუწია გადადება. თავდაპირველად სცენარის დასრულება იყო საჭირო, შემდეგ კი როცა ლონდონში გადაღებები უნდა დაწყებულიყო, კორონავირუსის პანდემიამ, ბევრი სხვა ფილმის გადაღებების მსგავსად, ისიც შეაჩერა. მიუხედავად ამისა, დიდ ბრიტანეთში კორონავირუსით გამოწვეული შეზღუდვები მაისში მოიხსნა და ჯადოსნურ ცხოველებ 3-ზე მუშაობა მაინც არ განახლებულა.

ფოტო: Warner Bros. Pictures

ფანებისთვის სასიხარულოდ, ედი რედმეინმა დაადასტურა, რომ ფილმზე მუშაობა ლონდონში ორი კვირის წინ დაიწყო. Warner Bros.-ს მსახიობებსა და გადამღებ ჯგუფს კორონავირუსის მკაცრი პროტოკოლების დაცვით ამუშავებს, რაზეც რედმეინი თავიდან ცოტათი დარდობდა:

ეს სრულიად ახალი ნორმაა. ხშირი ტესტირებები, პირბადეები. რეალურად, იმაზეც ვდარდობდი, პირბადეებს როგორღაც კრეატიულობაზე არ ემოქმედა. შესაძლოა, ეს ცოტა უცოდინრობით მომივიდა, მაგრამ ვფიქრობდი: ჩვენ, ადამიანებს, გვჭირდება თუ არა ინტერაქცია ერთმანეთისგან ინსპირაციის მისაღებად? რაც ნამდვილად იმედისმომცემია, ისაა, რომ ეს განსხვავებული პროცესია, მაგრამ მაინც ისეთ შეგრძნებას ტოვებს, თითქოს ყველაფერი ძველებურად მუშაობს და ყველა თავის მაქსიმუმს აკეთებს.

რედმეინის თავდაჯერება იმას უნდა მიანიშნებდეს, რომ ყველაფერი ძველებურადაა და ფანებს სადარდებელი არ აქვთ. ერთი სიტყვით, ჯადოსნური ცხოველები 3 იმედისმომცემად გამოიყურება და ამჯერად რას შემოგვთავაზებს ჯადოქრების სამყარო, ამას 2021 წლის 12 ნოემბერს გავიგებთ.

ფოტო: Warner Bros. Pictures