პარლამენტის თავმჯდომარე მიიჩნევს, რომ დავით უსუფაშვილის მონაწილეობა საკონსტიტუციო კომისიაში ძალიან მნიშვნელოვანი იქნებოდა, თუმცა კონკრეტული გარემოებების გამო ეს ვერ მოხერხდა. ამის შესახებ ირაკლი კობახიძემ დღეს გამართულ ბრიფინგზე განაცხადა:

"მე მქონდა პირადად კონსულტაცია ბატონ დავით უსუფაშვილთან, მისი ჩართულობა იქნებოდა ღირებული, თუმცა მან განმარტა, რომ ის პოლიტიკური კვოტით ვერ მიიღებდა მონაწილეობას კომისიის მუშაობაში. გამომდინარე იქიდან, რომ კრიტერიუმები იყო დაკონკრეტებული და გამომდინარე იქიდან, რომ მას აქვს პოლიტიკური წარსული და პოლიტიკური აწმყო, ის ვერც ექსპერტის რანგში მიიღებდა კომისიაში მონაწილეობას და ას გახდა მიზეზი იმ სამწუხარო გარემოებისა, რომ ბატონი დავით უსუფაშვილი ვერ ჩაერთვება კომისიის მუშაობაში."

საკონსტიტუციო კომისიის პირველი სხდომა ხვალ, 24 დეკემბერსაა ჩანიშნული. კომისია 73 წევრისგან შედგება, მათ შორის საპარლამენტო და არასაპარლამენტო პოლიტიკური პარტიების წარმომადგენლების, არასამთავრობო ორგანიზაციებისა და ექსპერტებისგან.