იტალიის პოლიციის ცნობით, ბერლინის საშობაო ბაზრობაზე სავარაუდო თავდამსხმელი, ანის ამრი მილანში მოკლეს. ინფორმაციას ამის შესახებ CNN ავრცელებს.

ეჭვმიტანილი მილანის ახლოს მდებარე ქალაქში, Sesto San Giovanni-ში სროლის შედეგად დაიღუპა. როდესაც კაცს საბუთები მოსთხოვეს, მან ზურგჩანთიდან 22 კალიბრიანი იარაღი ამოიღო და გაისროლა, რის შემდეგაც პოლიციელისგან საპასუხო ტყვიის შედეგად დაიღუპა.

იტალიის შს მინისტრმა პარასკევს გამართულ პრესკონფერენციაზე განაცხადა, რომ იტალიელი სამართალდამცავებს გერმანელ კოლეგებთან კომუნიკაცია ჰქონდათ. შს მინისტრმა იტალიელ პოლიციელებს მადლობაც გადაუხადა და თქვა, რომ მათ დაუყოვნებლივ ამოიცნეს და "გაანეიტრალეს" ეჭვმიტანილი. მისივე ცნობით, დაშავებულია ერთ-ერთი პოლიციელიც, რომელიც საავადმყოფოში გადის მკურნალობას.

ამასთან, მინისტრმა ოპერაციის დეტალებზე საუბრისგან თავი შეიკავა "რადგან გამოძიება ჯერ კიდევ მიმდინარეობს."

ბერლინის ცენტრში, საშობაო ბაზრობაზე სატვირთო მანქანის შევარდნის შედეგად 12 ადამიანი დაიღუპა და 48 დაშავდა.