პატრიოტთა ალიანსის ლიდერების მიერ ოკუპირებულ რეგიონში ჩატანილი და აფხაზების მიერ ენგურის ე.წ. გამშვებ პუნქტზე გამობრუნებული ხატი ირმა ინაშვილმა ბაგრატის ტაძარში გადაიტანა. ინაშვილი ხატს ჯერ "შერიგების სიმბოლოს" უწოდებდა, ახლა კი მას "დევნილთა შემწედ" მოიხსენიებს და ხატსაც "დევნილს" უწოდებს.

"გიხაროდენ! არასდროს დამავიწყდება ეს დღე", — წერს ინაშვილი და ამჯერად უკვე ილორის ტაძრიდან გამოტანილი ხატის ფოტოებს ავრცელებს, რომელსაც მამაოებისა და მრევლის პროცესია მოჰყვება პოლიტიკოსებთან ერთად

ღიად პრორუსული პარტია პატრიოტთა ალიანსი ოკუპირებულ რეგიონში ისე ჩავიდა, რომ ეს ინფორმაცია დამალა. აფხაზეთში ვიზიტის შესახებ ამბავი მთავარმა არხმა გაავრცელა, მოგვიანებით კი ე.წ. აფხაზი ვეტერანების ორგანიზაცია არუაამ დაადასტურა, რომ ისინი დე ფაქტო პრეზიდენტის თანაშემწეს, ლაშა საყანიას შეხვდნენ. თავდაპირველად, საყანიამ ინფორმაცია უარყო, შემდეგ დაადასტურა და დე ფაქტო ოპოზიციის პროტესტის გამო ე.წ. თანამდებობაც დატოვა.

ორგანიზაცია არუაასა და აფხაზეთის ე.წ. მართლმადიდებელი ეკლესიის წარმომადგენლებმა ილორის ტაძრიდან პატრიოტთა ალიანსის ნაჩუქარი ხატი გაიტანეს და ენგურსი ხიდზე ე.წ. გამშვებ პუნქტთან მიიტანეს.