"ამ ყალბ ყიჟინას რომ ვუსმენთ, დღეს ამომძვრალი დეპუტატებისგან. რაის შემკავებლები ხართ, რა საკაშვილის შემკავებლები ხართ, ერთმანეთს გადაასწრებთ კინწისკვრით, ვერ გაასწრებთ პარლამენტიდან" — ასე მიმართა დამოუკიდებელმა დეპუტატმა, ლევან გოგიჩაიშვილმა მმართველი გუნდის დეპუტატებს, რომლებიც ექსპრეზიდენტ მიხეილ სააკაშვილის სავარაუდო ჩამოსვლის საკითხს აფასებდნენ.

"რა მჯიღს იცემთ, თუ ესეთი მაგარი ბიჭები იყავით, ბევრს არ ვგულისხმობ, ვიწია ჯაფარიძეს არ ვგულისხმობ ნამდვილად, სად იყავით, როდესაც უჭირდა ამ ქვეყანას და თქვენს თანატოლებს ქუჩაში ხოცავდნენ. მაშინ სად იყავით?" — განაცხადა გოგიჩაიშვილმა პარლამენტში.

27 აგვისტოს საქართველოს ყოფილმა პრეზიდენტმა, მიხეილ სააკაშვილმა საკუთარ ფეისბუქგვერდზე ვიდეომიმართვა გაავრცელა, სადაც ის ამომრჩეველს ისევ ჩამოსვლას ჰპირდება, თუმცა ამჯერად არ აკონკრეტებს როდის. მმართველი გუნდის წარმომადგენლებმა ვიდეომიმართვის საპასუხოდ განაცხადეს, რომ მიხეილ სააკაშვილს დაბრუნების შემთხვევაში საქართველოში მართლმსაჯულება დახვდება.