გიორგი შაქარაშვილის საქმეზე მიმდინარე სასამართლო პროცესი კიდევ ერთხელ გადაიდო. დღეს სხდომის გადადების მიზეზი გარკვეული ტექნიკური საკითხების გაუმართაობა გახდა.

როგორც სხდომის დაწყების წინ პროკურორმა ნანა გუგუტიშვილმა ჟურნალისტებს განუცხადა, დღეს 8 მოწმის დაკითხვა იყო დაგეგმილი, თუმცა ეს ვერ მოესწრო. ადვოკატების თქმით, მხოლოდ ერთი პირი, არასრულწლოვანი ნ.ხ დაიკითხა სრულად, ხოლო დანარჩენი უკვე ხვალ გაგრძელდება.

ერთ-ერთი არასრულწლოვანი ბრალდებულის ნ.ც-ს ადვოკატის, არჩილ ბერიანიძის თქმით, ნ.ხ-ს დაკითხვით დადასტურდა მისი პოზიცია. კერძოდ, ის გარემოება, რომ მისი დაცვის ქვეშ მყოფს სხეულზე დაზიანებები ნამდვილად ჰქონდა მიყენებული.

აღნიშნული პროცესი, დღეს 15 საათზე დაიწყო და საღამოს 22 საათამდე იყო დაგეგმილი. ადვოკატი არჩილ ბერიანიძე აცხადებს, რომ სასამართლო პროცესების ასე გაჭიანურება, დაცვის მხარისთვის მიუღებელია და ეს არასრულწლოვნების უფლებების დარღვევად უნდა შეფასდეს.
ადვოკატის ზაქრო გვიშიანით თქმით კი, მიუღებელია არა მხოლოდ პროცესების არასამუშაო საათებში ჩატარება, არამედ მათი ყოველდღიურ რეჟიმში წარმართვაც.

"ყოველდღიურად, არასამუშაო საათებში პროცესების ჩატარება ნიშნავს, რომ ჩვენ ვერ ვიქნებით სათანადოდ მომზადებულები. დაცვის პოზიციის შესათანხმებლად, შესაჯერებლად აუცილებელია გარკვეული პაუზები. პროცესების, მინიმუმ დღეგამოშვებით ჩანიშნვნა", — აცხადებს იგი.

ადვოკატების ცნობით, სხდომა ხვალ, 1 სექტემბერს 12-ის ნახევარზე განახლდება.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც.-ს; ლ.შ.-ს; ნ.ქ.-ს და გ.მ.-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ.-ს და ა.ქ.-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.