ქართველი გამომცემლები სოლიდარობას უცხადებენ ნობელიანტ მწერალ, სვეტლანა ალექსიევიჩს, რომელიც ოპოზიციურ ორგანიზაციებთან კავშირის გამო საგამოძიებო კომიტეტში დაკითხვაზე დაიბარეს. მათი განცხადებით, ქართველი გამომცემლებისთვის ეს ბრძოლა და პროტესტი ნაცნობი, მშობლიური და განსაკუთრებით დასაფასებელია.

"მხარს ვუჭერთ ჩვენს ავტორს, ნობელის პრემიის ბელარუს ლაურეატს და ადამიანს, რომელმაც საბჭოთა სინამდვილე და პოსტსაბჭოური მემკვიდრეობა შთამბეჭდავად, შეულამაზებლად გააცნო მთელ მსოფლიოს. "უტოპიის ხმების" შემოქმედი დღეს თვითონ იმ სისტემის სამიზნედ იქცა, რომლის მსხვერპლებსაც ათეული წლების განმავლობაში იცავდა და ექომაგებოდა", — წერია გამომცემლების მიერ გავრცელებულ განცხადებაში.

მხარდამჭერ წერილს ხელს გამომცემლობა "ინტელექტი" და "არტანუჯი" აწერენ.

ბელარუსი მწერალი და ლიტერატურის დარგში ნობელის პრემიის 2015 წლის ლაურეატი, სვეტლანა ალექსიევიჩი საგამოძიებო კომიტეტში 25 აგვისტოს დაიბარეს.

40 წუთში დაკითხვიდან გამოსვლის შემდეგ მან ჟურნალისტებს განუცხადა, რომ ისარგებლა უფლებით, საკუთარი თავის წინააღმდეგ ჩვენება არ მიეცა. ასევე, მან უარი განაცხადა, გაუთქმელობაზე ხელი მოეწერა.

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

საბჭოს შექმნის გამო საგამოძიები კომიტეტმა საქმე აღძრა მუხლით, რაც გულისხმობს მოწოდებებსა და ქმედებებს, რომელიც ბელარუსის ეროვნული უსაფრთხოების წინააღმდეგაა მიმართული.

ალექსიევიჩის გარდა დაკითხვაზე საბჭოს კიდევ ოთხი წევრი დაიბარეს.