პარტიამ არჩევანი სამშობლოსათვის ენგურის ხიდის გახსნის თხოვნით მთავრობის ადმინისტრაციასთან აქცია გამართა. როგორც პარტიის თავჯდომარე, ლელა გულედანი აცხადებს, გალის მოსახლეობას 8 თვეა სახელმწიფო დახმარება არ მიუღია, რადგან ვერ გადმოდიან ენგურის ხიდზე.

"ჩვენ მივმართავთ თხოვნით პრემიერმინისტრს, შერიგების სამინისტროს, რომ გაიხსნას ენგურის ხიდი და, ზოგადად, შეისწავლონ ეს საკითხი და გადაწყვიტონ. რა ბედი ელოდება გალის მოსახლეობას, ასევე, სკოლა იწყება და როგორ ივლიან გალიდან ზუგდიდში სკოლაში ბავშვები და რატომ უნდა გადიოდნენ კარანტინს გალიდან წამოსული ადამიანები, ქართველები. ზუგდიდიდან ქუთაისში გადაადგილება უნდა უტოლდებოდეს გალიდან ზუგდიდში გადაადგილებას და კარანტინში ნამდვილად არ უნდა ხვდებოდნენ", — აცხადებს პარტიის თავჯდომარე.

ლელა გულედანის თქმით, აფხაზური მხარე ფასიანი სწრაფი ტესტების დაწესებას აპირებებს.

"აქედანაც იყოს რაიმე ტესტის დაწესება, ფასიანი იყოს თუნდაც. ესეც შეღავათია გალელებისთვის. ისინი იხვეწებიან, რომ რამენაირად ეს ხიდი გაიხსნას", — ამბობს გულედანი.

მისივე თქმით, მოსახლეობის გარკვეულ ნაწილს აქვს პინკოდი, რისი საშუალებითაც ბანკომატებიდან იღებენ შემწეობას, პენსიებს, თუმცა პინკოდი ყველას არ აქვს.