უკვე სატელევიზიო შოუს სამეფო ოჯახმაც იპოვა თავისი ლედი დი.

ნეტფლიქსის გახმაურებულ სერიალ The Crown-ში, რომელიც დიდი ბრიტანეთის სამეფო ოჯახის შესახებ მოგვითხრობს, პრინცესა დაიანას როლს ავსტრალიელი მსახიობი ელიზაბეტ დებიკი შეასრულებს.

ელიზაბეტ დებიკის სერიალის მეხუთე და მეექვსე სეზონებში ვიხილავთ: პრინცესა დაიანა პირველად მეოთხე სეზონში გამოჩნდება და მის როლს მსახიობი ემა კორინი შეასრულებს, ფინალურ სეზონებში კი მას ელიზაბეტ დებიკი ჩაანაცვლებს.

"პრინცესა დაიანას სულისკვეთება, სიტყვები და ქმედებები დღემდე მრავალი ადამიანის გულში ცოცხლობს. ნამდვილი პატივი და პრივილეგიაა იმ ჩინებულ სერიალში მონაწილეობა, რომელმაც პირველივე ეპიზოდიდან მიმიზიდა", — განაცხადა მსახიობმა ამ ფაქტის დაანონსებასთან დაკავშირებით.

ამ 29 წლის მსახიობს კინომაყურებლები იცნობენ ისეთ ფილმებში შესრულებული როლებით, როგორებიცაა The Great Gatsby და Guardians of the Galaxy Vol. 2. ელიზაბეტ დებიკი ასევე თამაშობს კრისტოფერ ნოლანის ახალ ფილმში Tenet, რომლის პრემიერაც უახლოეს მომავალშია დაგეგმილი.

როგორც ცნობილია, ნეტფლიქსის გახმაურებული დრამა The Crown მეექვსე სეზონით დასრულდება. სერიალის მეხუთე და მეექვსე სეზონები 90-ანებსა და 2000-იანებში განვითარებულ მოვლენებზე მოგვითხრობს. შესაბამისად, ეკრანებზე ვიხილავთ პრინცესა დიანას გარდაცვალების ამბავსა და ამ ფაქტით გამოწვეულ კრიზსს, რომელშიც სამეფო ოჯახი იმყოფებოდა.

სერიალში ამჟამად მთავარ — ელიზაბეტ მეორის როლს ოსკაროსანი მსახიობი ოლივია კოლმანი ასრულებს. ამ წლის დასაწყისში ცნობილი გახდა, რომ ფინალურ სეზონში მას ასევე ცნობილი ბრიტანელი მსახიობი, იმელდა სტონტონი ჩაანაცვლებს.

ამ შოუს ერთგული მაყურებლები დარწმუნებული უნდა იყვნენ, რომ წინ ნამდვილად დაძაბული და საინტერესო სანახაობა ელოდებათ, მანამდე კი ისღა დაგვრჩენია, მეოთხე სეზონს დაველოდოთ, რომლის პრემიერაც, დიდი ალბათობით, ამ წლის შემოდგომაზე შედგება.