საერთაშორისო გამჭვირვალობა — საქართველოს ცნობით, ახალციხის მუნიციპალიტეტში ეპიდემიოლოგიური ზედამხედველობის ყველა რგოლს ერთი ოჯახის წევრები აკონტროლებენ. კერძოდ, ახალციხის ააიპ საზოგადოებრივი ჯანდაცვის ცენტრის დირექტორი ნაირა ხაბულიანი და მისი შვილი, ნინო ზედგინიძე.

TI-ში ამბობენ, რომ ნაირა ხაბულიანი რამდენიმე ანაზღაურებად საქმიანობას ითავსებს — იგი ააიპ-ის დირექტორობასთან ერთად, კორონავირუსის დროს სამცხე-ჯავახეთში სამედიცინო დაწესებულებებში შექმნილ ცხელების ორივე ცენტრში (შპს ახალციხის კლინიკა იმედი, შპს აბასთუმნის ფილტვის ცენტრი) ეპიდემიოლოგად ერთდროულად მუშაობდა. ამას კი, ორგანიზაციის განცხადებით, კანონი კრძალავს.

ფოტო: საერთაშორისო გამჭვირვალობა — საქართველო

რაც შეეხება მის შვილს, ნინო ზედგინიძეს, საერთაშორისო გამჭვირვალობა — საქართველოს ინფორმაციით, იგი ბოლო სამი წელია, დაავადებათა კონტროლის ეროვნული ცენტრის სამცხე-ჯავახეთის განყოფილების უფროსია. ამავე ცენტრში მძღოლის პოზიციაზეა ხაბულიანის მეუღლე და ზედგინიძის მამა, თენგიზ ზედგინიძე.

ჯანდაცვის სამინისტრო რეგიონში არსებულ ეპიდემიოლოგიურ ვითარებაზე ზედამხედველობას სწორედ რეგიონული ცენტრის საშუალებით ახორციელებს. ეს რეგიონული განყოფილება კი მუნიციპალიტეტებში ააიპ საზოგადოებრივი ჯანდაცვის ცენტრებთან ურთიერთობას ხელშეკრულებით არეგულირებს, მათ შორის იმ ცენტრებთან, სადაც ნაირა ხაბულიანია ეპიდემიოლოგიურ სიტუაციაზე პასუხისმგებელი პირი.

საერთაშორისო გამჭვირვალობა — საქართველო ჯანდაცვის სამინისტროს შიდა აუდიტსა და ახალციხის მუნიციპალიტეტის მერიის შესაბამის სამსახურს მოუწოდებს, დედა-შვილის ინტერესთა კონფლიქტის საკითხით დაინტერესდნენ.

"ასევე მოვუწოდებთ სახელმწიფო აუდიტის სამსახურს, შეისწავლოს იმ სახელმწიფო სამედიცინო პროგრამების ხარჯები და შესრულების ეფექტიანობა, რომლებსაც დედა-შვილს დაქვემდებარებული უწყებები ერთობლივად ახორციელებენ", — ვკითხულობთ განცხადებაში.