ავღანეთის ციხეზე თავდასხმის შედეგად, სულ მცირე, 29 ადამიანი დაიღუპა. BBC-ის ცნობით, თავდასხმის უკან ტერორისტული დაჯგუფება ისლამური სახელმწიფო იდგა.

ISIS-ის მტკიცებით, შეტაკება აღმოსავლეთ ავღანეთის ქალაქ ჯალალაბადის საპატიმროში კვირას საღამოს, დანაღმული მანქანების აფეთქებით დაიწყო და ორშაბათ დილამდე გაგრძელდა. ავღანეთის უსაფრთხოების ძალებთან ისლამური სახელმწიფოს მებრძოლთა დაპირისპირებას 29 ადამიანი ემსხვერპლა, ათეულობით პატიმარი გაიქცა, ხოლო დაშავებულთა რაოდენობამ 43 შეადგინა. მათ შორის, 3 ისლამური სახელმწიფოს მებრძოლია.

მედიის ინფორმაციით, აღნიშნულ საპატიმროში 1 793 პატიმარია. მათი უმრავლესობა, დაჯგუფება ისლამური სახელმწიფოსა და თალიბანის მოძრაობის მებრძოლია. მედიის ცნობითვე, უცნობია დაიგეგმა თუ არა თავდასხმა კონკრეტული პატიმრების გათავისუფლების მიზნით.

თავდასხმა ავღანეთის მთავრობასა და თალიბანის მოძრაობას შორის ცეცლხის შეწყვეტის შესახებ დადებული ხელშეკრულების მესამე დღეს მოხდა. BBC-ის ცნობით, შეტაკებაში მონაწილეობა თალიბანმა უარყო.