საქართველოს მართლმადიდებელი ეკლესიის საპატრიარქოს ინფორმაციით, ექიმ-გინეკოლოგები და ის ქალები, რომლებმაც აბორტი გაიკეთეს, ხუდადოვის ტყის მიმდებარედ ეკლესიას ააშენებენ სამების სახელზე.

საპატრიარქოს თქმით, ისინი "ათეისტური რეჟიმის" გამო ვერ აცნობიერებდნენ "დიდ ცოდვას" და ამ ნაბიჯით ახლა სინანულს გამოხატავენ:

"ათეისტური რეჟიმის პირობებში მრავალი ადამიანი ვერ აცნობიერებდა, რამდენად დიდი ცოდვაა აბორტი და მას უბრალო მოვლენად აღიქვამდა. მას შემდეგ, რაც ჩვენი მოსახლეობის უდიდესმა ნაწილმა ეკლესიური ცხოვრება დაიწყო, დედებს, რომელთაც მუცლადღებულ ყრმათა მოწყვეტის დანაშაული აწუხებთ (მათ შორის ექიმ-გინეკოლოგებიც არიან) გაუჩნდათ სურვილი, თავისი სინანულის გამოსახატად ააგონ ტაძარი ყოვლადწმინდა სამების სახელზე".

ტაძრის აგების მსურველები საპატრიარქოში მივიდნენ და ისინი ილია II-მ დალოცა.